Atualità
Dala Junta: 200 posć por practicums d’isté, domandes ćina ai 31 de jenà
La Junta provinziala mët a desposiziun 200 posć por düć i jogn che ô fà n practicum tl’Aministraziun provinziala le proscimo ann d’isté. I practicums à na dorada da 6 edemes a 3 mëisc, le terminn por dè jö la domanda por n practicum é ai 31 de jenà.
I posć a desposiziun por n practicum tl’aministraziun publica tratan l’isté dl 2015 sarà indöt 200: Chësta dezijiun à la Junta provinziala tut incö, mertesc ai 25 de novëmber. Fà domanda po düć i scolars y studënć dla cuarta y cuinta tlassa dles scores altes y profescionales, dles universitês y studënć che à stlüt jö da püch so percurs academich. Le fin di practicums é chël da ti pité ai jogn la poscibilité da imparè da conësce le monn dl laûr y da fà insciö esperiënzes pratiches tl setur dl’aministraziun publica, „n’esperiënza che ne porta nia ma vantaji por i jogn, mo inće por l’aministraziun instëssa“, à dit le Presidënt dla Provinzia Arno Kompatscher incö do la sentada dla Junta.
Düć i interessà po presentè süa domanda ćina ai 31 de jenà tl Ofize Assunziuns Personal dla Repartiziun Personal dla Provinzia. La tomada por la presentaziun dles domandes é gnüda antizipada por podëi ti dè na resposta ai studënć ćina la fin de forà y „por che i jogn pois insciö planifiché damì l’isté“, à ajuntè Kompatscher.
L’oportunité da inrescì le funzionamënt dl’aministraziun publica é dër damanada dai jogn: insciö él gnü dè jö tl 2015 indöt 600 domandes por n practicum. Pro l’assegnaziun gnaràl tut en conscidraziun sides i bojëgns di ofizi co les competënzes di studënć y che reverda danter l’ater i titui de stüde y la conescënza di lingac.
rc
