Atualità
Dala Junta: Rëi de telescialdamënt a Balsan y spartiziun di fonds ambientai
La Junta provinziala à aprovè incö (25/11) danter l'ater le plan de svilup presentè da Ecotherm che prevëiga l’ampliamënt dla rëi de telescialdamënt a Balsan. "Cun l'aprovaziun da incö unse fat n gran vare inant tl vers dla sconanza dl tlima“, à splighé l'assessur Theiner. Implü à la Junta valuté positivamënter la spartiziun di fonds ambientai che reverda l’implant idroeletrich da Bornech.
La soma di fonds ambientai che vëgn paiada fora dala sozieté Hydros che à en gestiun l’implant idroeletrich da Bornech reverda la perioda dala tomada dla conzesciun tl 2014 ćina l’ann 2017. „La Junta provinziala à aprovè incö la spartiziun dla soma complessiva de indöt 3,6 miliuns de euro che ti jarà ala Provinzia y ai Comuns de Bornech, Valdaora, Percha, Rasun-Anterselva y Valsperch-Tesido. Dui terzi dla soma totala de compensaziun, 2,4 miliuns de euro, ti jarà ai Comuns tles vijinanzes y 1,2 miliuns de euro ti speta ala Provinzia“, à splighé incö l’assessur por l’energia Richard Theiner. “Por mirit di contribuć pol gnì finanzié mosöres concretes de ressanamënt dl ambiënt, por ejëmpl tres le ressanamënt y le sparagn energetich tla gestiun de ofizi publics, la creaziun de biotops nüs, le mioramënt dla rëi de destribuziun dl'ega da bëre, intervënć sön les pistes da jì cun la roda y tres la creaziun de fontanes por ćiarié sö les rodes eletriches“, à splighé l’assessur Richard Theiner.
Implü à la Junta provinziala inće dè so arat positif al plan de svilup presentè da Ecotherm che prevëiga l’ampliamënt dla rëi de telescialdamënt a Balsan. „La realisaziun dl ampliamënt dla rëi de tlescialdamënt é n gran vare inant por arjunje nüsc obietifs por ći che reverda le refornimënt cun energia nëta dla cité da Balsan,“ à dit incö l’assessur Theiner. Le plann plurianual d’ampliamënt prevëiga na spëisa de 73 miliuns de euro ćina le 2022, 20 miliuns gnarà metüs a desposiziun dala Provinzia sot forma de n contribut a Ecotherm GmbH. La curida dl refornimënt energetich dla cité da Balsan dess aumentè tres l’ampliamënt dla rëi de telescialdamënt dai 7 porcënt atuai a 22 porcënt tl 2022. „N gran vare inant inće por ći che reverda nüsc obietifs sciöche KlimaLandSüdtirol“, à stlüt jö Theiner. Le proiet dl ampliamënt dla rëi de telescialdamënt a Balsan gnarà presentè plü avisa en vëndres, ai 28 de novëmber tres na conferënza stampa dales 10 tla sënta dla Ecotherm GmbH a Balsan dal assessur por l’energia Richard Theiner, dal ombolt da Balsan Luigi Spagnolli, dal gestur dl Ecotherm GmbH, inj. Sergio Marchiori y dal diretur dla Agenzia por l’ambiënt Flavio Ruffini.
rc
