Atualità
L’ediziun nöia de ëres-FrauenInfoDonne tematisëia la violënza sön les ëres
La revista „ëres-FrauenInfoDonne“ che vëgn dada fora dala Comisciun por l’avalianza dles oportunitês, po gnì lita inće online y trata te süa cuarta ediziun la violënza sön les ëres y co che ara po gnì evitada y combatüda.
Le numer nü dla revista d’informaziun dla Comisciun por l’avalianza dles oportunitês trata en ocajiun dl Dé internazional cuntra la violënza sön les ëres da inier (25 de novëmber) dandadöt tematiches che reverda la prevenziun y la sensibilisaziun dles formes de violënza cuntra les ëres. Öna dles novitês te chësc vers é l’app por mitans y ëres jones nöia dal inom „Gitschn App/App per le ragazze“. L’app da püch é online y po gnì desćiariada debann. Por l’assessuria por l’avalianza dles oportunitês Martha Stocker é chësta na metoda inovativa y moderna por arjunje dantadöt les generaziuns nöies che s’anüza de smartphones por sensibilisé sön la tematica y por ti pitè n meso de defenüda y de pröm aiüt te caji de prigo. L'app à insciö na funziun cun n botun "SOS" che po gnì adorè te caji de prigo por ti menè n messaje d’aiüt y d’intervënt ales forzes dl ordinn.
N’atra tematica dla revista é n’intervista a Anna Maria Spellbring dla Ćiasa dles Ëres de Porsenù che nes spliga sciöche la prevenziun cuntra la violënza vëgn organisada tles scores tl Südtriol. Implü él da ciafè na suraodüda dla situaziun de violënza sön les ëres dla Talia tres la presentaziun de statistiches atuales scrita da Maria Cristina De Paoli. L’oferta informativa dla revista vëgn completada danter l’ater da n’intervista a Ivo Plotegher, responsabl dla Seziun dla Polizia Postala y dles Comunicaziuns che trata la tematica dla violënza sön internet, da na presentaziun dla profesciun y dla porsona Manuela Nocker, vizepresidënta dla Université Lëdia de Balsan LUB, dala presentaziun dl'ativité dla Comisciun por l’avalianza dles oportunitês, da na reportaja sön les desfarënzies dla ponsiun danter ëres y ëi y dala presentaziun dla scomenciadia "Iron Men" a Porsenù. Inultima pon inće ciafè n calënder cun les manifestaziuns y i evënć plü desvalis.
Le revista „ëresFrauenInfoDonne” é da ciafè debann tl Ofize Ëres dla Provinzia, via Danter 11 a Balsan (tel. 0471 / 416950, email: servizio.donna@provincia.bz.it) y po gnì desćiariada debann tl format pdf tlican chilò.
rc
