Atualità
Amur, furbaries y pasciuns:Oswald von Wolkenstein vëgn presentè tla Teßmann
La Biblioteca Provinziala Dr. Friedrich Teßmann inviëia ala presentaziun dl liber de Hubert Stuppner „Oswald von Wolkenstein: Liebe, List und Leidenschaft“. La vita dl poet y dl componist dl tëmp terdmedieval y sües creaziuns musicales y artistiches é al zënter dla publicaziun nöia che vëgn presentada ai 4 de dezëmber dales 20 Biblioteca Provinziala Dr. Friedrich Teßmann a Balsan.
De Oswald von Wolkenstein vëgnel cuntè che „al ê tan acort sciöche Odysseus, tan afamè d'amur sciöche le Don Juan y tan penitënt sciöche n prueder. Deboriada cun süa vëia d'aventöra y so dejidêr da ti lascè alsavëi al monn ći che ti stô a cör mostrâl na gran segurëza de sè instës acompagnada da na perzeziun narzisistica azentuada de sè.” La personalitè dl poet trubadur y componist dl tëmp terdmedieval vëgn descrita inant tl invit dla Biblioteca Teßmann sciöche „na porsona trata indalater: cun le müs ia por tera y le cör pro les ëres, Oswald ê n esistenzialist, che agî y reagî te na manira furiosa, colerica y impulsiva, mo osservâ dagnora sè instës cun plajëi y autocritica”.
La publicaziun de Hubert Stuppner cunta y descrî insciö te na manira plajora la vita plëna d'aventöres dl ultimo menestrel che adorâ sciöche un di ultims de so tëmp n lingaz metaforich original medieval. Tl liber él da ciafè dlungia ala descriziun dla personalité de Oswald von Wolkenstein inće sües ćianties d'amur traslatades danü y trascrites musicalmënter. La presentaziun dl liber „Oswald von Wolkenstein: Liebe, List und Leidenschaft“ de Hubert Stuppner vëgn tignida
en jöbia, ai 4 de dezëmber dl 2014,
dales 20.00
tla Biblioteca Provinziala Dr. Friedrich Teßmann,
str. A.-Diaz 8,
a Balsan
en presënza dl autur Hubert Stuppner, de Hans Drumbl (parores de salüt) y de Luis Benedikter. L'entrada é debann, plü informaziuns pon ciafè tres la plata internet: http://www.tessmann.it/.
rc
