Atualità
Paleobotanica tla Talia: pröma publicaziun importanta tl Museum Natöra
500 agn te un n liber: Le Museum Natöra à dè fora la pröma publicaziun importanta sön la storia, le svilup y les descurides dla paleobotanica, chël ô dì dl'inrescida de plantes fossiles tla Talia. Le liber é gnü presentè incö, ai 27 de novëmber da Evelyn Kustatscher, öna dles auturies prinzipales y paleontologa tl Museum Natöra.
Le liber dal titul "La storia delle piante fossili in Italia - Palaeobotany of Italy" che é gnü presentè incö tl Museum Natöra é na publicazun de feter 400 plates. Al mët dant na suravijiun dla flora di ultimi 300 miliuns d'agn tla penisola taliana y sintetisëia la posiziun atuala dla sciënza. "La publicaziun ne spliga nia ma les plantes fossiles mo inće i resć de plantes ciafà te fosses y insediamënć preistorics" dij Kustatscher.
Le liber é inće n'opera de consultaziun deache al contëgn na lista dles coleziuns sternüdes fora sura döta la Talia y dötes les publicaziuns di ultimi secui che reverda le tema dles plantes fossiles, dles spores y dl stöp dles flus. "Le liber descrî la storia dl'inrescida de plantes fossiles pian ia da stories y liëndes vedles dles prömes descriziuns de corëć de plantes tl 16ejim secul, ćina ala fin dl 19ejim secul, canche chësc ćiamp dla sciënza à arjunt süa floridöra", à splighé Guido Roghi dl Consëi nazional dles inrescides de Padua che vëgn dant sciöche un di auturs prinzipai, deboriada cun Evelyn Kustatscher, Adele Bertini (Université de Firenze) y Antonella Miola (Université de Padua).
Indöt contëgn le liber contribuć de 42 auturs, al é da ciafè ilustraziuns detaiades y a corusc y tofles storiches, y al à bele arjunt sü pröms suzesc: "La publicaziun spezialistica de nosc museum à bele descedè n gran interès en gaujiun dl Convëgn europeich de paleobotanica y palinologia a Padua", à alzé fora Vito Zingerle, diretur dl Museum Natöra che injunta ćiamò: "Chësta pröma descriziun dla storia dla paleobotanica tla Talia y la sintesa de düć i dać scientifics rapresentëia na pera miliara por dötes chës porsones che s'interessëia de plantes fossiles". Karin Dalla Torre, direturia dla Repartiziun provinziala Museums, à implü ćiamò sotrissé che la publicaziun fej conësce resultać importanć dl'inrescida d'interès por scienzià y inće por nia scienzià.
Le liber "La storia delle piante fossili in Italia - Palaeobotany of Italy" (ISBN: 978-88-87108-06-4) costa 25 euro y é da ciafé da cumprè tla botëga dl Museum Natöra tla Bindergasse a Balsan.
rc
Galaria dales fotografies
Foto: Repartiziun Museums - Igor Bianco
