Atualità
Premiaziun proieć de formaziun politica: L’ITE Raetia é inće laprò
Colié la fantasia y la pratica cun l’aprofondimënt de n tema d’atualité: Chësta é stada la sfidada dl proiet „Politische Bildung“ che é gnü organisè dal'Intendënza todëscia adöm a chëra ladina, por tlasses dles scores mesanes, altes y profescionales. Le concurs scolastich é rovè incö (27/11) tla fasa finala cun la presentaziun y valutaziun di 8 mius proieć a Balsan.
Chësc ann tol les scores dl Südtirol pert por le secundo iade indolater al concurs scolastich „Politische Bildung“ (formaziun politica) che vëgn metü da jì dala Zentrala por formaziun politica da Bonn tla Germania. L’ediziun 2014 dl concurs é rovada incö, 27 de novëmber, tla fasa finala südtiroleja cun la presentaziun di davagnadus dl proiet a Balsan. "Chësc concurs é na bela scomenciadia por avijiné nüsc jogn al'importanza da se dè jö cun tematiches che porta a s'engajé por chestiuns politiches, soziales y de storia", à splighé l'assessur por la scora todëscia Philipp Achmmer tratan la finala, a chëra che al é inće stà presënć i intendënć Roland Verra y Peter Höllrigl.
Di indöt 30 proieć dać jö nen n’él gnü chirì fora 8 che é gnüs presentà dales tlasses instësses incö, jöbia ai 27 de novëmber, a Balsan dan na comisciun che à spo chirì fora i mius. Un di proieć che é rovà tla fasa finala, y che à stlüt jö te süa categoria al terzo post, é stè chël dla terza tlassa dl ITE Raetia da Urtijëi. La terza C dl ITE Raetia à presentè n proiet tla categoria "Billige T-Shirts", cun chël che la tlassa à tematisé la contradiziun de n consumism che se damana prîsc tres plü basc y les condiziuns de laûr zënza garanzies di lauranć y dles laurantes di gragn conzerns dla produziun de massa che sovënz ne conësc nia sü dërć. „Cun l'aprofondimënt de na tematica che reverda la formaziun politica impara i scolars nia ma conescënzes, mo inće competënzes nöies, por ejëmpl sön co inrescì y presentè chestiuns d’atualitè“, à splighé l’Intendënt por la scora ladina Roland Verra.
Al concurs à tut pert tlasses dla scora mesana, dla scora alta y profescionala che ê partides sö te trëi categories desvalies: tlasses dla scora mesana (1), tlasses di pröms trëi agn dla scora alta y profescionala (2) y tlasses dla cuarta y cuinta scora alta (3).Davagnè à tla pröma categoria la 2A dla scora mesana de Graun, tla secunda categoria la terza tlassa dl ginase "Walther v.d.Vogelweide" y tla terza categoria la 4 tlassa GB dl Zënter dles scores altes de Türesc. Le concurs scolastich, che é organisé tl Südtirol dal’Intendënza todëscia adöm cun chëra ladina, à invié les tlasses dles scores mesanes, altes y profescionales a laurè fora, aprofondì y conzepì n tema d’atualité dè dant y da le presentè a atres tlasses de na manira plajora y interessanta. Düc i 30 laûrs gnarà menà a Bonn tla „Bundeszentrale für politische Bildung“ aulà che al sarà spo na valutaziun/gara danter i laûrs menà ite da n gröm de scores dla Germania y dl’Austria.
rc
Galaria dales fotografies
