Atualità
Le novëmber plü ćialt dal mëteman dles mosoraziuns
Tan ćialt co mai denant, dër mol y püch sorëdl: chësc é le ressumé di meteorologs dl Sorvisc Meteo dla provinzia por ći che reverda le tëmp tl mëis de novëmber. Les temperatöres é stades altes tratan döta la sajun da d’altonn che é le secundo altonn plü ćialt dal mëteman dles mosoraziuns dl tëmp.
Le mëis de novëmber, che va bel plan a fin, é stè, tres i dać dl Sorvisc Meteo dla Provinzia, te döt le Südtirol le novëmber plü ćialt dal mëteman dles mosoraziuns dl tëmp. A Balsan por ejëmpl ne n’él mai gnü mosorè temperatöres tan altes dal 1850, ann te chël che an â scomencè cun les mosoraziuns. Le valur mesan a Balsan é stè chësc ann de 9,7 degrà celsius, mesamënter é le valur te novëmber 6,0 degrà. Inće ti atri raiuns dla Provinzia é la temperatöra dl mëis de novëmber stada mesamënter de 4,0 degrà plü alta co le valur mesan. Öna dles gaujies prinzipales por temperatöres tan altes é stada la presënza de tröpes niores che à architè sö la desfridada dl’aria tles valades y che à portè a n tlima ćiöbe tratan les nöts.
N ater valur che é da alzè fora é la gran cuantitè de plöia che é tomada tratan novëmber: insciö él tomè dui ćina trëi iadi tan tröpa ega co mesamëmter. La cité cun la cuantité de plöia maiù é stada cun 220 milimetri de prezipitaziuns Maran. La presënza dl sorëdl é de conseguënza stada sot le valur mesan: a Balsan él gnü registrè 80 ores de sorëdl, demanco co ti ultims agn.
L’altonn meteorologich dl 2014 é insciö, do l’altonn 2006, le secundo altonn plü ćialt dal mëteman dles mosoraziuns: te setëmber él gnü mosorè 1 n degra sura le valur mesan, de otober 2 degrà y de novëmber é stada la temperatöra de 4 degrà plü alta co mesamënter. Les staziuns de Maran y Bornech à mosorè ćianmai n altonn plü ćialt co tl 2006. La temperatöra plü alta da d’altonn é gnüda mosorada ai 7 de setëmber a Balsan cun 28,4 degrà, la temperatöra plü basa a Sterzing ai 30 d’otober cun manco 4,7 degrà celsius. Ti raiuns da munt é la temperatöra plü basa stada manco 15,2 degrà, n valur che é gnü mosorè ai 22 d’otober sön la Schöntaufspitze a 3330 metri d’altëza sura le livel dl mer.
L’altonn é stè te döta la Provinzia dai 20 ai 50 porcënt plü mol co mesamënter, dandadöt por la gran cuantité de plöia che é tomada de novëmber. Ma tla Val Venosta y tla Val de Türesc é la cuantité de plöia tomanda püch dessot co le valur mesan.
Cun le 1. de dezëmber mët ofizialmënter man l’invern meteorologich. Informaziuns sön le previjiuns dl tëmp pon ciafè sön la plata internet dl Sorvisc Meteo dla Provinzia http://www.provinzia.bz.it/meteo-ladin/home.asp, y tres l’app „Südtriol Wetter“, ajornada cuotidianamënter cun les informaziuns plü atuales.
rc
Galaria dales fotografies
Foto: USP/Sorvisc meteo provinzia
