Atualità
Abo+ cun funziuns nöies por studënć: Paiamënt ćina Desproch
Plü funziuns à da śëgn inant l Abo+ por studënć sura i 18 agn: cun l’ativaziun de na funziun de paiamënt aposta saràl poscibl da paié diretamënter cun la cherta dl Abo+ plü sorvisc dl trasport publich local, sciöche por ejëmpl la tarifa por le trasport dla roda y i iadi danter Prener-Desproch o Sanćiana-Lienz.
La poscibilité ajuntiva de paiamënt ne va nia en funziun automaticamënter, ara po indere gnì ativada tres la plata internet http://www.suedtirolmubilta.info. Do l’ativaziun dl sorvisc de paiamënt podarà i anuzadus dl Abo+ ćiarié sö scioldi sön so account personal sön la plata internet dl Südtirol Pass. Tres la registraziun saràl poscibl da ativè n coliamënt automatich cun la cherta „ÖBB-Vorteilscard“ cun le vantaje che al gnarà calcolè automaticamënter le cost a plü bun prisc dl iade sön les trates austriaches. Atri vantaji dla funziun nöia é la poscibilité da paié le trasport de rodes o tiers y l’adoranza dles corieres dl Nightliner tres l Abo+. Implü él inće poscibl da controlè les trates che an à fat y da blochè la cherta sce an ess da la perd.
Por l’assessur por la mobilité Florian Mussner é chësc „n vare important por le svilup dl Südtirol Pass cun n ampliamënt pratich dl abonamënt che se svilupëia tres deplü a na cherta multifunzionala.“ Cun le Südtirol pass y l’abonamënt Abo65+ pon bele da plü tëmp s’anuzé de chëstes funziuns. „Cun le start dl coliamënt nü dles ferates ćina Desproch y Lienz unse inće ativé les funziuns ajuntives de paiamënt por i studënć“, insciö Mussner.
Anotaziun importanta por i anuzadus dl sorvisc: Cun l’ativaziun dla funziun de paiamënt ajuntiva messarà l ABO+ gnì adorè sciöche le Südtirol Pass, chël ô di che al é nezesciar da timbrè tles corieres tl mëteman dl iade y ala fin, y da inserì le code dl iade tles staziuns canche an tol la ferata. L’ativaziun ne podarà nia plü gnì revocada.
rc
