Atualità
Dé mondial cuntra l’AIDS al 1° de dezëmber
Al vëgn sciazè che sön le monn él plü co 35 miliuns de porsones che s’à taché le virus HIV. Baldi ne él atualmënter degöna cura, mo al é poscibl da archité le svilup dla maratia cun medejines. „La prevenziun y l’educaziun é fondamentales, deache l’AIDS é tres ćiamò n prigo che ne po nia gnì sotvaluté“, à dit l’assessuria por la sanité Martha Stocker.
Cun 1,5 miliuns de caji de mort é l’AIDS al sesto post tla tlassifica dles gaujes prinzipales de mort sura döt le monn. Por mirit dl’archirida él stè meso da svilupé de plü tratamënć cun chi che al é poscibl da archité y tignì sot a control la maratia, mo na cura ne é baldi nia ćiamò gnüda ciafada. Sce na porsona se à taché n iade cun le virus HIV él debojëgn da se curé por döta la vita y da tó ite medejines che po inće avëi de gran faziuns colaterales.
Vigni ann vëgnel registré tl Südtirol söporjö 20 infeziuns nöies cun HIV. Na diagnosa abonora dl’infeziun y na assistënza medica che pëia ia atira dedô é fondamentales: „Sce valgügn dubitëia de s’avëi tachè le HIV él important da fà atira les analises“, spliga l’assessuria por la sanité Martha Stocker, „deache na terapia abonora po influenzè cotan le svilup y archité ćinamai le mëteman dla maratia.“
Le test dl HIV po gnì fat debann ti ospedai da Balsan, da Porsenù, da Bornech y a da Maran. L’organisaziun ProPositiv da Balsan pîta inće la poscibilité, cun na prenotaziun, da fà n test te na manira anonima. Chësc proiet é ponsè sciöche n sorvisc por inrescì le plü debota che ara va sce na porsona s’à taché le virus y por la informè da tó dötes les mosöres de prevenziun nezesciaries por smendrì les poscibilitês de trasmisciun dl virus. Plü informaziuns sön le sorvisc de ProPositiv pon ciafè tres la plata internet dl'organisaziun: http://www.propositiv.bz.it/.
rc
