Atualità
Contrat de sorvisc cun Trenitalia: Ferates nöies y sparagn de 1,7 miliuns
Cun condiziuns nöies à la Junta provinziala aprovè incö (02/12) le contrat de sorvisc por le trasport cun la ferata cun Trenitalia tl Südtirol por i proscimi agn: „Insciö sparagnuse tl dagnì anualmënter 1,7 miliuns, zënza che l’oferta y la cualité dl sorvisc vëgnes smendrides“, à splighé l’assessur por la mobilité Florian Mussner. Implü messarà Trenitala mëte a desposiziun ferates nöies.
Na gran pert dl sorvisc feroviar tl Südtirol vëgn garantì atualmënter da Trenitalia, la sozieté prinzipala che se crüzia dl trasport cun la ferata de persones tla Talia. Ala fin de chësc ann se röia le contrat de sorvisc che la provinzia à cun Trenitalia y por garantì inant le trasport à la Junta provinziala stabilì incö, mertesc ai 2 de dezëmber da prolungé le contrat ćina l’ann 2024 – cun na regolamentaziun transitoria por le proscim ann 2015. Tl contrat nü él preodü che Trenitalia garantësces inće tl dagnì zirca mesa l’oferta che vëgn pitada tres le trasport cun la ferata tl Südtirol.
Por l’assessur por la mobilité Florian Mussner contëgn le contrat de sorvisc nü döes de bunes noeles. La pröma: Cun le contrat nü sparagna la provinzia indöt 1,7 miliuns de euro al ann en confrunt a denant, cun la garanzia che Trenitalia messarà mantignì inće tl dagnì i medemi standarg por ći che reverda la cualité y l’oferta. „Dötes les spëises é gnüdes calcolades sön la basa de criters stabilis avisa dal regolamënt europeich y cun l’aplicaziun de n model di cosć standard“, insciö l’assessur. Le cost dl contrat de sorvisc nü é de 36 miliuns de euro al ann, vigni chilometer che les ferates fajarà ti costarà ala provinzia dal 2015 inant 12,9 euro, impede che atualmënter 13,5 euro.
Bele calcolà laprò é te chëstes spëises i contribuć che la provinzia ti metarà a desposiziun a Trenitala por la cumpra de ferates nöies. „Trenitalia messarà insciö cumprè set ferates Flirt nöies por le trasport local tl Südtirol che gnarà metüdes en funziun ćina alplütert te jügn dl 2017“, à splighé Mussner. „Chësc ô di che da jügn 2017 gnaràl adorè sön dötes les trates dla ferata (adöm inće ai coliamënć sura i confins fora) les ferates modernes Flirt. Chësc porta para n alzamënt cualitatif dl sorvisc, n aumënt dla capazité y na reduziun di cosć tres l’anuzamënt de material unitar“, à splighé l’assessur Mussner.
rc
