Atualità
Euregio sön les scines: La rëi dles ferates vëgn ampliada
Le trasport feroviar sura i confins fora gnarà amplié por mirit de n’acordanza danter Südtirol y le Land Tirol. Insciö gnaràl pité dai 14 de dezëmber inant de plü coliamënć direć danter Balsan y Desproch y n coliamënt vigni ora danter Franzensfeste y Lienz. „L’ampliamënt dl’oferta é inće n sëgn de vijinanza y comunanza dles provinzies “, insciö l'assessur por la mobilité Florian Mussner.
L’oferta di coliamënć dla ferata danter le Südtirol y le Land Tirol vëgn ampliada. Öna dles prioritês dla colaboraziun sot le tët dl’Euregio é bele da plü agn la mioraziun dl’oferta dl trasport publich danter les provinzies sciöche inće l’assessur por la mobilité Florian Mussner à sotligné incö: „Na rëi dl trasport publich plü ampla ne favorësc nia ma na mobilité ecosostenibla mo inće la colaboraziun danter les regiuns,“ insciö l’assessur do che la Junta provinziala ti à dè incö l’inćiaria da firmé n’acordanza cun le sorvisc di trasporć dl Land Tirol.
L’acordanza prevëiga l’ampliamënt dl’oferta sön les döes trasses dla ferata danter le Südtirol y le Tirol: da öna na pert danter Balsan y Desproch y dal’atra pert danter Franzensfeste y Lienz. „Implü él gnü programè che les ferates de coliamënt danter Lienz y Desproch passa te intervai sincronisà por evité tëmps de aspeta lunć söi confins y pro les coinzidënzes“, à splighé l’assessur Mussner. I coliamënć nüs pëia ia cun le start dl orar dla ferata da d’invern ai 14 de dezëmber.
Dal 14 de dezëmber inant gnaràl insciö garantì dui coliamënć ajuntifs al dé direć danter Balsan y Desproch te trames döes les direziuns (start da Balsan dales 07.31 y da Desproch dales 06.22) y da sëra (start da Balsan dales 20.31 y da Desproch dales 21.03). Implü vëgnel istituì n coliamënt cun ferates che passa te intervai regolars vigni ora sön la trassa Lienz-Franzensfeste cun l’ezeziun de n’interuziun da misdé (che podess gnì stlüta tl 2016).
Da mez dezëmber inant saràl insciö vigni dé set coliamënć cun coinzidënzes danter Lienz y Desproch (tres la Val de Puster passan por Franzensfeste), tolon en conscidraziun inće les ferates EC y IC. Implü gnaràl eliminé tla staziun dla ferata de Franzensfeste les barieres architetoniches por alisiré l’anuzamënt dl trasport publich da pert de düć i zitadins. „Por adatè la staziun unse bele ciafè n’acordanza cun RFI y al é probabl che i laûrs metarà man do Pasca dl 2015“, à splighé Mussner. Les spëises por i coliamënć sura i confins fora sarà indöt de 4,3 miliuns de euro por i proscimi cin’ agn.
rc
