Atualità
Fira otica y secundo cabl danter Balsan y Maran
Al va inant l'ampliamënt dla rëi de fira otica tl Südtirol: incö (ai 2 de dezëmber) à la junta provinziala aprovè l'intenüda cun la RFI che vëiga danfora da adorè i laûrs de manutenziun sön la linia dla ferata danter Balsan y Maran por mëte n secundo cabl de fira otica sön chësta trassa y aumentè la segurëza dla trasmisciun di dać.
La junta provinziala va inant vare do vare por garantì i coliamënć internet aslöms te döt le Südtirol, inće tres soluziuns nöies y inovatives, che garantësc n coliamënt aslöm, scëmpl y bun marćé. Ara se trata dl coliamënt de fira otica danter Balsan y Maran: La rëi dla ferata taliana RFI à preodü tratan le 2015 laûrs de manutenziun straordinara sön la linia dla ferata Balsan-Maran, y la Provinzia à atira tut sö contat cun i responsabli dla RFI por valuté la poscibilité da mëte n cabl de fira otica danter les döes citês prinzipales.
Incö à la junta aprovè le schema d’intenüda che rapresentëia le resultat de chësta tratativa: ara prevëiga che la Provinzia adores i laûrs dla RFI sön la trassa dla ferata por mëte n secundo cabl de fira otica sön la trassa Balsan-Maran, che conzed da cherié la "redondanza" che al va debojëgn sön la trassa prinzipala y da tignì fora dejsorvisc por mirit de n secundo cabl.
"La segurëza pro la trasmisciun de dać ne vëgn spo nia ma garantida dales impreses mo inće y dantadöt da strotöres sanitares che po se lascè sön n coliamënt 24 ores sön 24 por mirit dl tru dopl", à sotrissé do la sentada le presidënt dla Provinzia Arno Kompatscher. Da svilupé la rëi, é chësta pratica dla "redondanza" preodüda inće por döta la rëi primara cun la costruziun di anì de rëi realisà ti agn: "Por ejëmpl Bornech ne gnarà nia ma arjunt tres la Val de Puster, mo inće tres la Val Badia y Gherdëna", à splighé Kompatscher.
usp
