Atualità
Dala Junta: 70 miliuns por l’economia, le frabiché abitatif y i Comuns
La Junta provinziala à aprovè incö, mertesc ai 2 de dezëmber, la spartiziun dles ressurses finanziares de 70 miliuns de euro che ti vëgn trasferides dala regiun. 40 miliuns é gnüs lià tres le fonds de rotaziun por sostignì ativitês economiches, 20 miliuns por investimënć ai Comuns y d’atri 10 miliuns por la cumpra y la realisaziun dl azès a zones por frabiché.
Cun le trasferimënt dles competënzes dala regiun ales döes provinzies à la regiun a desposiziun ressurses finanziares che ara ne é nia buna da dè fora ( por gauja dla manćianza de competënzes) y che vëgn insciö partides sö danter les döes provinzies. “La regiun à metü la condiziun che les provinzies mëss adorè chisc mesi finanziars por investimënć“, à splighé incö, mertesc ai 2 de dezëmber, le presidënt dla provinzia Arno Kompatscher do che la Junta provinziala à tut la dezijiun da spartì sö i 70 miliuns de euro che messâ ćiamò gni spartis sö por completè le program d’investimënć por l’economia locala.
Insciö à la Junta provinziala aprovè chësta spartiziun: 40 miliuns de euro va tl fonds de rotaziun sciöche impuls al’economia, 20 miliuns de euro por la conzesciun de imprësć alisirà por le finanziamënt de investimënć di comuns y 10 miliuns por la cumpra y les spëises dl’urbanisaziun de raiuns por le frabiché abitatif da pert di comuns.
Bele ala fin de setëmber él gnü aprovè na pröma pert di mesi finanziars che vëgn dala regiun. Di 30 miliuns a desposiziun é 10 miliuns gnüs adorà por smendrì i tëmps de aspeta por contribuć por l’agricoltöra, 11 miliuns é gnüs metüs tl fonds de rotaziun por la promoziun dl’economia, cinch miliuns de euro – sciöche incö – por la cumpra y les spëises dl’urbanisaziun de raiuns por frabiché da pert di comuns y cater miliuns por contribuć por le ressanamënt energetich dla cubatora bele esistënta.
rc
