Atualità
Energia, A22, staziun da Balsan: Kompatscher a Bruxelles y Roma
Do le start da inier (01/12) dla macroregiun alpina a Milan sarà le presidënt dla Provinzia indoman (mercui) a Bruxelles y en jöbia ai 4 de dezëmber a Roma: tla capitala europeica él preodü incuntades sön l’energia, le tunel de basa dl Prener y l’A22, a Roma jarara dla staziun dla ferata de Balsan y dla convenziun Rai por les mendranzes.
Le presidënt dla Junta Arno Kompatscher à anuzé la sentada dla Junta incö, mertesc ai 2 de dezëmber, por informè i mëmbri sön i contignüs dla Conferënza de Milan che é stata le segnal de start por la creaziun tl 2015 de na macroregiun alpina (comunicat a pert) che gnarà fata sö sön trëi pilastri: n svilup economich sostenibl, n renforzamënt dla conetivité (dl trasport y tres la rëi digitala) y na proteziun dl’ambiënt alpin. Kompatscher à sotligné l’importanza da nominé n coordinadù che pois garantì n prozés tresfora de gestiun dla macroregiun.
Dui terminns importanć à le presidënt dla Provinzia ti proscimi dis. Indoman sarà Kompatscher a Bruxelles por na seria de incuntades olache al sarà tl zënter les chestiuns d’energia, dl dagnì dal conzesciun dl’A22 y dl tunel de basa dl Prener y de sües trates d azés. En jöbia sarà le presidënt a Roma olache al é preodü döes incuntades: öna cun RFI por definì l’acordanza por la modernisaziun dla staziun dla ferata da Balsan tl cheder dl proiet dl areal nü, y l’atra cun le secretêr de Stat competënt por la convenziun y le finanziamënt di programs Rai tl Südtirol por les mendranzes todëscia y ladina.
rc
