Atualità
Boletin dles lovines plü menü da atira y plü sovënz
Le pröm boletin dles lovines de chësta sajun é online. Al é döes novitês importantes pro le sorvisc cuntra les lovines dla Provinzia chësc invern: na previjiun menüda dl prigo de na lovina por vigni dé dl’edema y na majera frecuënza d’emisciun. Implü él gnü fat fora cun i sorvisc cuntra les lovines vijins da publiché les "situaziuns tipiches".
Le boletin dles lovines é na fontana d'informaziun fondamentala por planifiché bele 24 ores denaco pié ia cun i schi. Por chësta rajun vëgnel publiché le domisdé tert. Cun la sajun nöia él n valgönes novitês che reverda la frecuënza d’emisciun y i contignüs: le cör dl boletin dles lovines n’é nia plü la situaziun dl dé d’emisciun mo la previjiun dl prigo de lovines di dis dedô. Le boletin gnarà publiché dlungia le lönesc, mercui y vëndres inće la sabeda por curì damì la fin dl’edema. "Sce le prigo de lovines s’alza fora de nia o sce al é situaziuns dër critiches vëgn le boletin ajornè vigni dé", sotrissëia le diretur dla Proteziun zivila y dla Proteziun cuntra le medefüch Hanspeter Staffler.
Por alisiré la valutaziun y l'interpretaziun dl prigo de lovines gnaràl da chësc invern inant inće ajuntè les “situaziuns tipiches” tl boletin dles lovines. Günther Geier, coordinadù provinzial dl Sorvisc cuntra les lovines spezifichëia che "n model basè sön mesi scëmpli po daidé reconësce situaziuns complesses che regolëia la formaziun dles lovines." Al gnarà metü a desposiziun sis situaziuns tipiches: nëi frësca, nëi ventada, nëi bagnada, nëi vedla cun strać debli, slisoramënt dla cutra de nëi y situaziuns positives. Chëstes situaziuns tipiches sarà le pröm punt dl boletin dles lovines; a chësta moda vëgn le problem prinzipal dles lovines che caraterisëia le dé lascè alsavëi sciöche pröma informaziun.
Dötes les informaziuns é da ciafè tla rëi zivica sön www.provinz.bz.it/lawinen; implü vara da cherdè sö le 0471 271177 o 0471 270555.
USP
