Atualità
Kompatscher dal presidënt CONI por implanć sportifs y n slalom tl’AltaBadia
Na convenziun de plü agn por la realisaziun de implanć sportifs gnarà firmada dala Provinzia y dal CONI bele tl scomenciamënt dl 2015: la basa por n’acordanza é gnüda ciafada inier (04/12) dal presidënt dla Provinzia Kompatscher a Roma tratan n’incuntada cun le presidënt dl CONI Giovanni Malagò. Danter les tematiches tratades inće n slalom strënt sön la Gran Risa y i mondiai de biathlon te Puster.
La Provinzia fajarà fora na convenziun cun le CONI por n’acordanza de plü agn por le finanziamënt di implanć sportifs tl Südtirol ćina l’ann 2018. „Chësta acordanza prevëiga n finanziamënt dl 50 porcënt da pert dl CONI y reverda chi implanć che gnarà fać sö te püch tëmp“, à sotligné le presidënt Kompatscher do la sentada cun le suranstant dl sport talian Malagò. La firma sön l’acordanza é preodüda por i 19 de jenà 2015 tl Südtirol. Implü él gnü stabilì che al ne gnarà nia plü tut ca i mesi finanziars dl CONI por curì les spëises por les sojornanzes por s’alenè tl Südtirol. „Chëstes ressurses gnarà adorades por organisè de gran manifestaziuns sportives“, insciö Kompatscher.
Kompatscher à spo portè dant al presidënt dl CONI Malagò la domanda da sostignì l’inserimënt tl calënder dla copa dl monn de schi alpin de na gara de schi de slalom strënt tl'Alta Badia, dlungia la gara tradizionala de slalom lerch sön la Gran Risa. „Almanco vigni dui agn dess la gara podëi gnì fata“, à dit Kompatscher. Inće chësta chestiun gnarà tratada ai 19 de jenà tl Südtirol, canche al é preodü n’incuntada danter Kompatscher y Malagò cun le presidënt dla FISI Flavio Roda. Implü à le presidënt Malagò confermè le sostëgn por na candidatöra nöia de Antholz sciöche sënta di Mondiai de biathlon, do che al é bele gnü porvè n iade da se candidé por chësta manifestaziun sportiva: „Le CONI à assiguré so sostëgn por na candidatöra nöia olache inće la Provinzia fajarà süa pert“, à splighé Kompatscher. Na dezijiun finala da se candidé ti speta al Comitê d’organisaziun de Antholz.
Tl contest dla sentada à le presidënt Malagò inće confermè süa solidarieté y vijinanza cun Carolina Kostner: „I sperun naturalmënter che la chestiun vegnës stlarida te na manira positiva, sides por le sport che por n’atleta che ti à dè tröp al sport“, à stlüt jö Kompatscher.
rc
