Atualità
Practicums da d’isté tl'aministraziun provinziala, domandes ćina ai 31/01
Indöt 200 sarà i practicums che l’aministraziun provinziala mët a desposiziun por le proscim isté por scolars, studënć y academics che à stlüt jö da püch le stüde. Les domandes por n practicum po gnì dades jö ćina en sabeda, ai 31 de jenà dl 2015, por le 2016 él preodü n aumënt di posć.
Le practicum da d’isté é gonot por studënć y scolars öna dles prömes esperiënzes de laûr y la provinzia de Balsan mët insciö a desposiziun por le 2015 indöt 200 posć por scolars, studënć y academics che à stlüt jö da püch süa formaziun por n practicum tl’aministraziun publica cun na dorada da un a trëi mëisc. Les domandes por n practicum po gnì dades jö ćina en sabeda, ai 31 de jenà dl 2015. L’assessuria por l’aministraziun publica Waltraud Deeg recorda che la data „é gnüda antizipada a na manira che i podun ti dè na resposta ai candidać por i pröms dis de merz por ti jì adincuntra ala programaziun di scolars y studënć por i mëisc da d’isté.“
Por le practicum da d’isté él inće preodü n davagn dai 30 ai 50 euro brutto al dé y por ći che reverda la posiziun tles gradatöres él i candidać cun le titul de stüde plü alt che à les mius poscibilitês. Tl 2014 él gnü presentè 600 domandes por i 200 posć a desposiziun y por chësta rajun oress l’assessuria Waltraud Deeg aumentè le numer di practicums dal 2016. „I ùn bele ciafè na pröma acordanza cun i sindacać sön chësta chestiun y al podess ester na buna ocajiun da cherié sinergies danter les generaziuns al’intern dl’aministraziun publica“, insciö Deeg.
Bele da śëgn él poscibl da dè jö domandes, dötes les informaziuns nezesciares y i ejëmpli de domandes da scrì fora sarà desponibles da en mertesc, ai 9 de dezëmber tres la plata internet dla Repartiziun personal (www.provincia.bz.it/personale). Por plü informaziuns prëibel contatè l’Ofize Assunziuns personal, strada Renon 13, a Balsan (0471 412118, 0471 412116) o tres la plata internet www.provincia.bz.it/personale/temi/assunzione-tirocinanti-amministrazione-provinciale.asp. La gradatöra cun düć i candidać che à ciafè n practicum gnarà publicada, cun gran probabilité, al 1 de merz dl 2015 sot a chësta misciun: www.provincia.bz.it/personale/temi/graduatorie.asp.
rc
