Atualità
Volontariat: Les competënzes gnarà documentades tres n atestat
Por documentè les esperiënzes y competënzes di volontars à le comitê de osservanza dl volontariat, cun a će le presidënt dla Provinzia Arno Kompatscher, stabilì incö, vëndres ai 5 de dezëmber, l’introduziun de n atestat de volontariat. „Chësc é n at de reconoscimënt implü por le gran impëgn dles porsones che laôra sciöche volontars“, à sotligné le presidënt dla Provinzia Arno Kompatscher.
Le comitê de osservanza dl volontariat é metü adöm da rapresentanć de ënć y assoziaziuns che laôra te plü seturs: dal ćiamp sozial ala sanité, al sport y al ambiënt. I compić de chësta istituziun é da osservè la situaziun tl setur no-profit tl Südtirol, da portè dant propostes y da dè jö arać por promöie y mioré le volontariat. „Incö él le Dé dl volontariat – à splighé le presidënt Arno Kompatscher – y chësta é n’ocajiun por sotligné la gran valüta dl volontariat por la sozieté. N südtirolej sön trëi fej pert de öna dles 2.117 assoziaziuns iscrites tl register provinzial y nos düć messun reconësce la gran importanza che chësta gran rëi de solidarieté ti pita ala sozieté cun sorvisc ti seturs plü desvalis. Le volontariat é aldedaincö n aiüt y n sostëgn indispensabl por le funzionamënt dla sozieté.“
La novité plü grana che é gnüda presentada incö dal comitê d’osservanza dl volontariat é l’introduziun de n atestat de volontariat, te chël che al gnarà documentè les esperiënzes y conescënzes di volontars. „Le atestat é na sort de zertificatiun dles competënzes y esperiënzes che po ester dër d’ütl por i jogn inće tratan la chirida de n laûr“, á splighé le presidënt Kompatscher. N grup de laûr se fistidiarà, en colaboraziun cun dötes les organisaziuns interessades, dla creaziun y realisaziun pratica dl atestat. Atres tematiches tratades tratan l'incuntada é stades mosöres de sostëgn por assigurè i volontars y le renforzamënt y l’ampliamënt dl sorvisc zivil volontar.
rc
Galaria dales fotografies
