Atualità
Sensibilisaziun y mosöres concretes: Plü segurëza por i peduns
Les porsones che se möi a pé tl trafich é la pert plü debla sön strada y mëss insciö gnì stravardada te na manira particolara por podëi ti garantì na maiù segurëza: “La Provinzia laôra sön de plü livì, – spliga l’assessur Florian Mussner – tres mosöres concretes de metüda en segurëza dles strisciores pedonales y tres campagnes de sensibilisaziun sciöche por ejëmpl cun SOS Zebra."
Öna dles formes de sensibilisaziun che an vëiga le plü sovënz é i gragn placać dla campagna S.O.S. Zebra che é posizionades tles vijinanzes dles strisciores pedonales mo che é ma na picera pert dles mosöres d'educaziun stradala che vëgn realisades chësc ann dandadöt tles scores cun proieć concreć. “Cun les scomeciadies tles scores orunse che i scolars dala pröma tlassa dla scora elementara ales scores altes se engajëies diretamënter por na mobilité plü sostenibla y por n comportamënt plü sigü y responsabl sön strada”, spliga l’assessur por la mobilité Florian Mussner che sotlignëia che les ativitês tles scores ne é nia ma ponsades por i scolars mo inće por i geniturs y i maestri. Implü é un di obietifs prinzipai dla campagna inće chël da sensibilisé i autisć sön n comportamënt de respet tl confrunt di peduns, recorda l’assessur.
Pro la realisaziun pratica di proieć tles scores po l’assessur Mussner s’anuzé dla colaboraziun dl "Ökoistitut" y dla polizia comunala. “Te döta la Provinzia él stè ćina śëgn 55 tlasses che s’à scrit ite a nüsc proieć che prevëiga por ejëmpl l’identificaziun di prighi sön le tru de scora, eserzizi pratics por la segurëza sön strada y l’adoranza de mesi de trasport ecologics sciöche la roda o i mesi publics, sciöche inće plü ativitês tl Safety Park”, dij Andreas Pichler, suranstant dl Ökoistitut.
Söporjö 76 Comuns colaborëia cun la polizia comunala che organisëia tles scores leziuns de comportamënt responsabl tl trafich: “Dandadöt tles prömes trëi tlasses dles scores elementares é le focus dl insegnamënt sön n dërt comportamënt tla vijinanza de strisciores pedonales, deache tröc mituns danter i 5 y i 8 agn va a pé a scora”, spliga Christian Carli, le presidënt dl’assoziaziun dla polizia comunala tl Südtirol. Te na verjiun ajornada él inće gnü publiché la brosciüra nöia dla campagna S.O.S.Zebra che vëgn realisada dales repartiziuns Sorvisc Strades y Mobilité y che contëgn informaziuns y consëis d’ütl sön n comportamënt sigü por peduns y autisć tla vijinanza de strisciores pedonales. La brosciüra nöia po gnì desćiaridada sön la plata internet dla Repartiziun Sorvisc Strades: (www.provinz.bz.it/strassendienst).
N’atra mosöra de prevenziun cuntra inzidënć stradai é implü la realisaziun de costruziuns architetoniches da pert dl Sorvisc strades dla Provinzia por aumentè la segurëza dles strisciores pedonales. Insciö él gnü controlè dötes les 1350 strisciores pedonales dla Provinzia che é gnüdes analisades por ći che reverda i aspeć dla segurëza, dla visibilté, dles segnalaziuns sön strada y dl’ilominaziun. “Les strisciores pedonales che ê les plü prigoroses é bele gnüdes metüdes en segurëza, por la realisaziun de de nöies ùnse metü adöm la ligna de normes plü rigoroses”, spliga l’assessur por la mobilité Florian Mussner. Insciö mëss les strisciores pedonales nöies gnì ilominades bun (inće les sperses d’azés y de speta por i peduns) y po ma gnì realisades olache al é na visibilité tlera sides por peduns co por autisć. “Prinzipalmënter gnaràl ma dè l’autorisaziun por la realisaziun de strisciores pedonales olache ares va debojëgn, por ejëmpl dlungia les scores y scolines”, insciö Mussner che injuntëia che al mëss inće gnì garantì n azés diret ai marciapîsc. Chëstes mosöres é nezesciares por aumentè la segurëza di peduns, mo che é ma d'ütl sce düć se tëgn al codesc dla strada y a n comportamënt respetus sön strada: “I fajun insciö inće n apel ai autisć che ai rovënes cun ciorvel y che ai adatëies la velozité ales condiziuns dl trafich por minimisé la probabilité de inzidënć”, stlüj jö l’assessur Florian Mussner.
rc
Galaria dales fotografies
