Atualità
Orars nüs por les corieres y ferates dai 14 de dezëmber inant
Da en domënia, ai 14 de dezëmber, se müda i orars dl trasport publich tl Südtirol cun l’ativaziun dl orar da d’invern por les ferates y les corieres. Insciö saràl a desposiziun dai 14/12 inant plü ferates de coliamënt sura le Prener. Novitês él inće por ći che reverda i orars dles corieres che an à porvè da adatè deplü ales nezescitês di utënć.
„I orars dl trasport publich é n cantier che resta tresfora davert - spliga l’assessur por la mobilité Florian Mussner – y nosc impëgn é chël da analisé l’oferta pitada dal trasport publich local y dala adeguè ales esigënzes nöies di pendolars, viajiadus y utënć dl trasport publich.“ Cun l’ativaziun dl orar da d’invern da en domënia, ai 14 de dezëmber, él preodü mudaziuns importantes tl trasport cun la ferata, dandadöt cun n ampliamënt di coliamënć danter Desproch y Balsan y inće danter Franzensfeste y Lienz passan por Puster.
I orars dles corieres vëgn laorà fora en colaboraziun cun i Comuns, les assoziaziuns turistiches, les scores y les istituziuns interessades. Insciö gnaràl metü a desposiziun de plü coliamënć da doman y da sëra y n potenziamënt di iadi tles y por les localitês turistiches. I ajornamënć, les novitês y n cheder complet di orars tl detai pon lì do online sön la plata internet: http://www.suedtirolmubilta.info/. Tres la chirida online vëgnel dè dant avisa i orars di mesi publics te döt le Südtirol y eventualmënter inće i trus che an mëss fà a pé da na staziun o da n'architada al'atra. Por les valades ladines é chëstes les mudaziuns nöies plü importantes: le coliamënt cun la coriera „Skibus Gherdëina“ vëgn intratan pité sciöche ligna publica „352“ y sarà insciö plü saurì da ciafè. Sön la ligna 445 da Toblach a Ampëz saràl poscibl da adorè les corieres dl gestur „Cortina Express“ cun chertes dl sistem tarifar dl Südtirol. La pröm iade tl Nightliner (i orars nüs por i nightliner piarà ia en vëndres ai 19) dala Val Badia a Bornech vëgn sostituì cun n iade dla ligna 460 che pëia ia dales 19.40 da Corvara y dales 20.19 da Bornech.
Öna dles novitês plü granes dl trasport sön les scines é l’ampliamënt di coliamënć direć danter Balsan y Desproch (cater en döt, dui cun partënza da Balsan dales 7.31 y dales 20.31 y dui cun partënza da Desproch dales 6.22 y dales 21.03). Implü gnaràl pité n coliamënt cun la ferata te n interval regolar de öna n’ora danter Lienz y Franzensfeste tres Puster, cun n’ezeziun tratan döes ores da misdé. „Chësc ampliamënt é na gran arjunta por la mobilité sura i confins y pîta insciö la basa por na maiù vijinanza danter les döes provinzies“, dij l'assessur Mussner. Na vijinanza che sarà inće da odëi simbolicamënter sön les ferates che portarà le blasun dl’Euregio.
rc
