Atualità
Defibriladëures: śën scemplificazion per la lies dl sport
La Jonta provinziela à apurvà dan puech na delibera n cont dla ublianza per i mplanc dl sport d’avëi da garat n defibriladëur. "Alincontra de coche fova l regulamënt da dant iel śën stat mesun, n cunlaurazion cun l cunsorz di chemuns, d’arjonjer n gran alesiramënt per la lies dl sport", dij l’assessëura Martha Stocker.
Coche udù danora tla delibra dla Jonta provinziela ne iel śën nia plu ublianza dla lies dl sport ma di patrons di mplanc sportifs de njinië n defibriladëur. Danz muessel śën ntan i alenamënc y la garejedes vester presënta iló na persona che sebe da manejé l defibriladëur. De chësc muessa se cruzië la lia dl sport. Na nuvità ie oradechël che la validità dl atestat de cualificazion per l manejamënt dl defibriladëur ie unida slargeda ora. "Uni persona che manejea n defibriladëur muessa avëi na furmazion aposta n chësc cont. L atestat de cualificazion per manejé l defibriladëur vel śën doi ani mpede un n ann, cossa che alesirea bele dassënn la lies che manda la persones da d’ëiles nciariedes a fé chësta furmazion. Cialeron che chësc atestat vele tl daunì zënza limitazion de tëmp coche l possa unì nterpretà da n scrit curespundënt dl Ministere per la Sanità", dij Stocker.
I njins dëssa unì cumprei cun l sustëni dl cunsorz di chemuns coche l’assessëura Stocker à fat ora cun l presidënt dl cunsorz di chemuns Andreas Schatzer. "A chësta moda possel unì fat n apalt a livel provinziel per duc i chemuns adum, acioche l sibe puscibl cumpré i njins a n miëur priesc", nsci Schatzer y Stocker.
USP
