Atualità
Museum Ladin: presentaziun catalogh sön la mostra dla stüa tla Val Badia
En domënia, ai 21 de dezëmber, gnaràl presentè dal assessur por la cultura ladina Florian Mussner dales 15.30 tl Museum Ladin Ćiastel de Tor a San Martin n catalogh nü realisé en ocajiun dla mostra “Le cör dla ćiasa – La stüa tla Val Badia”. La mostra sarà da odëi indô dai 26 de dezëmber, dé dla daurida invernala dl Museum Ladin a San Martin.
Da can incà àn pa na ora tl aredamënt dla stüa? Da can incà àn pa finestres de vider? Co fajôi pa da ilominé la stüa denant che al rovass adalerch la forza eletrica?
Cun na documentaziun fotografica de Alfred Erardi y Gustav Willeit y tesć de Helmut Stampfer, Emauel Valentin y Hans Grießmaier prô la publicaziun nöia dl Museum Ladin da ti dè na resposta a chëstes domandes cun n’inrescida storica y etnografica sön la presënza dla stüa tles ćiases dla Val Badia. La presentaziun dl liber nü “Le cör dla ćiasa – La stüa tla Val Badia” gnarà tignida
en domënia, ai 21 de dezëmber
dales 15:30
tl Museum Ladin “Ćiastel de Tor”
a San Martin de Tor
en presënza dl’assessur por la cultura ladina Florian Mussner, dl storich de ert y un di auturs Helmut Stampfer, dl diretur Stefan Planker y dla curadëssa dla mostra Katharina Moling. La mostra, che é gnüda inaugurada chësc isté, sarà da odëi indô dai 26 de dezëmber inant tl Museum Ladin. Por plü informaziuns prëibel contatè le Museum Ladin Ćiastel de Tor, via Tor 65, San Martin de Badia , tel. 0474 524020.
rc
