Atualità
Vierschach: La staziun dla ferata nöia é en funziun - "Na pera miliara"
Passè dala ferata diretamënter sön la pista dai schi: da śëgn é chësc passaje inće poscibl tl raiun da jì cun i schi dl Helm, tl’Alta Val de Puster, olache al é gnü inaugurè dan da püch dal assessur por la mobilité Florian Mussner y dal’assessuria tiroleja Ingrid Felipe la staziun dla ferata nöia de Vierschach-Helm – na pera miliara dla mobilité che coliëia l’Euregio.
La domënia, ai 14 de dezëmber dl 2014 é stè n dé important por la storia dla mobilité dl’Euregio: da öna na pert él gnü inaugurè la staziun dla ferata nöia de Vierschach-Helm tl’Alta Val de Puster, dal’atra pert él gnü dè le segnal de start al ampliamënt di coliamënć direć dl’Euregio sön les trasses Balsan-Desproch y Lienz-Franzensfest.
Cun l’introduziun dl orar da d’invern y en colaboraziun cun les ferates austriaches dl’ÖBB él gnü amplié cotan l’oferta dles ferates sön le linies Balsan –Desproch y Lienz – Franzensfest. Insciö él vigni dé döes ferates che coliëia diretamënter da trames les perts Balsan y Desproch (partënza da Balsan dales 07:31 y dales 20:31 y da Desproch dales 06:22 y dales 21:03). Implü él gnü amplié sön la trassa Franzensfeste – Sanćiana – Lienz les ferates che passa śëgn te n interval regolar - cun n ezeziun da misdé - de vigni ora. „Cun l’ampliamënt dl’oferta dl trasport publich sön les scines orunse ti pité a nüsc zitadins n’ocajiun comota, sigüda y a bun prîsc da descurì les perts desvalies di raiuns vijins“, à sotligné l’assessur por la mobilité Florian Mussner che à inauguré en domënia ai 14 de dezëmber la staziun dla ferata nöia de Vierschach-Helm tl’Alta Val de Puster adöm a süa colega dal Tirol Ingrid Felipe. L’assessuria à sotligné te chësta ocajiun „che cun l’ampliamënt dl trasport publich dl'Euregio él gnü fat n vare important, che à ghiré inće tröp coraje.“
La staziun dla ferata de Vierschach é n ejëmpl concret dla colaboraziun strënta tl setur dla mobilité danter Südtirol y Tirol, insciö é la staziun te Südtirol, mo fej inće pert dla rëi dles ferates dl’Austria. L’assessur por la mobilité Florian Mussner à sotligné l’importanza dla staziun, dandadöt por le svilup dl turism: „Cun la ferata âl metü man le svilup turistich, y aldedaincö se desmostra chësc meso de trasport n investimënt important por le dagnì“, insciö l’assessur Mussner che à recordè valgönes poscibilitês nöies che la staziun porta cun sè: „Por ejëmpl vëgnel amplié les ofertes dl tëmp lëde por i zitadins, che röia vigni ora ćina Lienz y plü saurì ćina Desproch.“ Implü garantësc la staziun dla ferata nöia n coliamënt scëmpl y comot cun i raiuns da jì cun i schi dl Helm y de Plan de Corones, che an po arjunje dales staziuns jon a pé.
L’architada nöia dla ferata da Vierschach-Helm é gnüda realisada dala STA (Strotöres Trasport Südtirol). Ara à n lift, n bagn y n automat por fà les chertes, la staziun é zënza barieres architetoniches. Al é inće gnü fat plü intevënć pro la staziun: insciö él gnü ressanè na trassa dles scines da 900 metri, al é gnü spostè le tru da jì cun la roda y al é gnü fat sö n sotpassaje por le tru dles rodes y n marciapîsc nü.
rc
Galaria dales fotografies
