Atualità
Pat de garanzia:Löm verda dala Junta, Renzi firma la comunicaziun por Viena
La Junta provinziala à aprovè incö le test de lege en discusciun al Senat sön le pat de garanzia danter Roma y Balsan che reveda le finanziamënt dl’Autonomia. "I ùn aprovè la pert che reverda le pat de garanzia tla lege de stabilité, deache dötes les acordanzes é gnüdes respetades“, à splighé le Presidënt Kompatscher.Intratan à le premier Renzi firmé la comunicaziun scrita por Viena.
Por che les acordanzes nominades tl pat de garanzia ciafes inće forza legislativa él debojëgn de na lege „renforzada“, chël ô di de na lege statala che vëgn inće aprovada dales döes Provinzies y dala Regiun. „Ma te chësta manira é na mudaziun dl titul numer 6 dl Statut d’Autonomia, che regolamentëia le finanziamënt, poscibla“, à splighé incö le presidënt dla Provinzia Arno Kompatscher. La Junta provinziala à detlarè da ester a öna cun la proposta de emendamënt che le govern orarà inserì tla lege de stabilité y che surantol insciö i contignüs dl pat de garanzia. „La Junta à dè löm verda inće deache dötes les acordanzes é gnüdes mantignides“, insciö Kompatscher che à recordè che inće la Junta dla Provinzia de Trënt messarà dè so arat positif, sciöche inće la Regiun. „Deache al é inće preodü na reorganisaziun dla cuta söl valur ajuntè, de chëra che al jarà ma plü un en diejimo (impede dui) ala Regiun y le secundo ales döes Provinzies, él inće la Regiun che messarà aprovè l’emendamënt“, insciö le Presidënt dla Provinzia Arno Kompatscher. La pert dla cuta söl valur ajuntè che ti jarà ala Provinzia sarà ot diejimi (impede set), un n diejimo ti jarà al Stat (sciöche denant) y un ala Regiun.
Implü à le premier Matteo Renzi sotescrit incö la lëtra che gnarà inviada al premier austriach Werner Faymann, cun chëra che l’Austria vëgn informada, fajon referimënt al apajamënt dan les Naziuns Unides tl 1992, sön l’acordanza nöia ciafada por le finanziamënt dl’autonomia tres le pat de garanzia. „Le Stat detlarëia inće che al porvarà da ciafè n consëns cun les mendranzes linguistiche interessades por vigni mudaziun nöia dla situaziun atuala“, insciö Kompatscher.
Implü à le Presidënt dla Provinzia Arno Kompatscher informè incö la Junta provinziala sön la composiziun de n grup de laûr, formè da esperć dl setur dla legislaziun y dl’autonomia, che laurarà fora ti proscimi mëisc na proposta de reorganisaziun dla spartiziun dles competënzes danter le Stat y les Provinzies dl Südtirol y Trënt. „Le svilup dl’autonomia reverda inće la segurëza legislativa, y insciö orunse davagné zoruch les competënzes che i ùn pordü ti ultims agn por gauja de sentënzes iuridiches dla Curt costituzionala dal 2001 inant. Te chësta fasa orunse laurè fora na proposta de mudaziun por stabilì plü segurëza dles competënzes, smendrì les poscibilitês d’interferënza da pert dl Stat y por ciafè laprò eventualmënter plü competënzes, sciöche por ejëmpl tl setur dl’ambiënt“, à splighé Kompatscher. Dl grup de laûr fêjel pert esperć de dërt costituzional: Christoph Perathoner, Karl Zeller, Esther Happacher, Lorenzo Dellai, Francesco Palermo, Marco Boato, Luca Zeni, Roberto Tognatti, Giuseppe Detomas y Giuseppe Volpe. La proposta laurada fora dal grup de laûr dess daldô gnì presentada ales döes Juntes provinziales por sües valutaziuns.
rc
