Atualità
Dala junta: de merz diretives nöies sön i apalć
Les diretives nöies sön i apalć de fornidöres, sorvisc y operes publiches é tl laûr da gnì laurades fora sön inćiaria dla junta provinziala, che à aprovè incö (ai 16 de dezëmber) les bases y i obietifs dl dessëgn de lege che vëgn. Da jenà laôron sön i articui cun les perts interessades, de merz le dessëgn de lege.
Tó y jì cun i impedimënć tla fasa d’azès ala gara, renforzè la partezipaziun dles pices impreses y dles impreses mesanes, smendrì la burocrazia por aministraziuns y aziëndes: chisc é i fins primars che an ô arjunje cun le dessëgn de lege nü sön i apalć publics. "L'assegnaziun dles inćiaries publiches mëss rapresentè na poscibilité por les pices impreses dl post y mëss se basè sön na prozedöra scemplificada y na normativa tlëra por dötes les perts che fej para", à dit le presidënt Arno Kompatscher do la sentada dla junta. Tignin cunt dl cheder iuridich nü aprovè dal'UE d'aurì, dess les diretives provinziales nöies ciafè sö les modalitês por colié le miù che ara va les lercs iuridiches pitades cun i bojëgns dl post reai.
Paolo Montagner, diretur dl'Agenzia provinziala por i contrać publics (le zënter de competënza di apalć publics tl Südtirol) y so predezessur Thomas Mathà, che à coordiné le grup de laûr à portè dant ći che al é gnü fora pro la sentada dla junta sön l'iter de elaboraziun dles diretives sön chëres che le ddl nü se basarà. Danter jügn y otober à incër trënta esperć y tecnics aprofondì i aspeć organisatifs cun le fin da arjigné ca n test por scemplifiché la materia, smendrì la burocrazia, sostignì les pices impreses y les impreses mesanes y en general miorè les bandides publiches tl Südtirol y stabilisé l'aplicaziun. "Ma ti ultimi 8 agn à le Stat mudé 200 iadi la normativa", à recordè Montagner.
Danter i obietifs concreć da arjunje à Montagner nominé le comosoramënt dles prozedöres en referimënt ales somes - les regoles por na bandida da 100 mila euro n’é nia les medemes co pro na gara da 100 miliuns - la scemplificaziun di elaborać de proiet y les prozedöres scemplificades por l'azès dles impreses ala bandida. Mathà à lascè alsavëi i tëmps di proscimi vari: da jenà dl 2015 tolarà dötes les perts interessades (perts soziales, ordinns profescionai, istituziuns apaltantes) pert ala redaziun di articui de lege, de merz messarà gnì definida la proposta dl ddl por gnì spo sotmetüda d’aurì ala valutaziun dla junta provinziala.
USP
