Atualità
Ferata dla Val Venosta, acordanza cun Terna y fujiun SEL-AEW
Na seria de carateristiches tecniches dl proiet che reverda l’eletrificaziun dla linia dla ferata dla Val Venosta é gnüdes aprovades incö (16/12) dala Junta provinziala che ti à dè l’inćiaria por la planificaziun dl proiet ala STA y a Südtirol Finance y che prevëiga n investimënt de 56 miliuns de euro. Implü él gnü aprovè n’acordanza cun le gestur dla rëi dla forza eletrica nazionala Terna.
La Junta provinziala à stabilì incö, mertesc ai 16 de dezëmber, danter l’ater na seria de carateristiches tecniches dl proiet che reverda l’eletrificaziun dla linia dla ferata dla Val Venosta. „I ti ùn insciö dè l’inćiaria ala STA y a Südtirol Finance da laurè fora la planificaziun operativa por la gestiun y le finanziamënt de döta l’operaziun. Al se trata de n investimënt de söporjö 56 miliuns de euro“, à splighé incö le Presidënt dla Provinzia Arno Kompatscher. „La soma d’investimënt é dër alta – à recordè l’assessur por la mobilité Florian Mussner – mo al é n proiet important por la popolaziun, por l’ambiënt y inće por n smendrimënt di cosć tl dagnì“. Insciö costa atualmënter ma i laûrs de manutenziun dles locomotives diesel vigni ann sura 2 miliuns de euro, implü él n stüde dla Provinzia che prevëiga che 6 agn do la planificaziun (preodüda por le 2015) sarà l’eletrificaziun dla linia dla ferata n vantaje sides economich co ambiental. Implü él preodü n aumënt di iadi dles ferates che passarà vigni 30 menüć y cun n coliamënt diret vigni ora danter Mals y Balsan zënza coinzidënzes a Maran. „Cun l’eletrificaziun sarà inće le desturb acustich dles ferates mënder y al gnarà eliminé 7.800 tonelades de CO2 al ann “, insciö Mussner.
Implü él gnü aprovè incö dala Junta provinziala n’acordanza mascimala cun le gestur dla rëi dla forza eletrica nazionala Terna che dess miorè la colaboraziun cun Terna por potenzié la rëi dla forza eletrica tl Südtirol y por amplié la partezipaziun dla Provinzia ales dezijiuns tl setur dl’energia. „Le fin dl’acordanza é chël da garantì la segurëza y la cualité dl refornimënt de forza eletrica por la popolaziun y por l’economia y da smendrì i caji de manćianza d’eletrizité sciöche por ejëmpl tl invern 2013“, à splighé incö l’assessur por l’energia Richard Theiner do la sentada dla Junta. Por merit dl’acordanza saràl poscibl da mioré l’infrastrotöra por le refornimënt dl’energia y da garantì n svilup sostenibl por l’ambiënt y la contrada, à recordè Theiner.
Inultima à la Junta provinziala stabilì incö da spostè l’udiënza preodüda por indoman pro le Tribunal alt dles eghes en cunt ala fujiun danter SEL y AEW tl setur dl’energia. „La Junta provinziala sostëgn la fujiun dles döes sozietês por cherié öna n’aziënda tl setur dl’energia por podëi garantì sön döt le teritore dl Südtirol n refornimënt cun energia vërda, renovabla y „fata en ćiasa“. Tles proscimes edemes déssel gnì ciafè cun SEL y AEW n’acordanza definitiva sön i passaji ćiamò da stlarì, porchël él la Provinzia y i comuns de Balsan y Maran che damanarà n spostamënt dl’udiënza preodüda por indoman“, à splighé incö l’assessur por l’ambiënt Richard Theiner. Ti proscims dis gnaràl metü sö n comitê che arà le compit da acompagné y monitoré la planificaziun dles ativitês de trames döes les sozietês.
rc
