Atualità
Plann nü dles pistes da schi, Theiner: „Plü cualité por le setur“
Le plann de setur nü por i implanć portamunt y por les pistes da schi é gnü presentè inier (17 de dezëmber) dal assessur competënt Richard Theiner: la Provinzia à svilupé n plann de dorada lungia che à sciöche obietifs le sparagn de ressures, la scemplificaziun dla burocrazia, la sconanza dl ambiënt y dantadöt n aumënt dla cualité tl setur da jì cun i schi.
„Cun le plann de setur nü por i implanć portamunt y por les pistes da schi – à sotligné inier l’assessur por le svilup dl teritore Richard Theiner – unse arjunt plü obietifs importanć: na planificaziun de dorada mesana – lungia, na separaziun tlera danter planificaziun y proietaziun, na partezipaziun plü direta di grups d’interès, n sparagn dles ressurses, le mantignimënt dla sussidiarité danter la Provinzia y i Comuns y la scemplificaziun burocratica dles prozedöres d’autorisaziun.“ Cun l’aprovaziun dl plann nü à la Junta provinziala inće renforzè ofizialmënter le „no“ a pistes nöies y implanć portamunt nüs, ara à indere definì n conzet por les zones dai schi. „Chëstes zones fej referimënt a arees bele esistëntes y adeguades por n svilup cualitatif dles infrastrotöres dai schi tl Südtirol. Le plann confermëia implü la proibiziun tlera por ći che reverda la previjiun de zones da jì coi schi nöies.“
La direturia dl Ofize Planificaziun dl teritore Virna Bussadori à splighé che da śëgn inant gnaràl tut de plü en conscidraziun pro les dezijiuns che reverda implanć y pistes nöies „i criters sciöche le arjunjimënt dl raiun, les chestiuns ambientales y economiches, la desponibilité dles ressurses idriches y l’oferta generala dal punt de odüda dl turism.“ Vignöna dles 42 zones da jì coi schi é insciö gnüda analisada por ći che reverda i faturs prinzipai che reverda la planificaziun y programaziun, danter chisc él i punć de forza, i punć de deblëza, les oportunitês y i prighi de vigni singula zona da jì coi schi. Na seziun aposta tol en conscidraziun indere les tematiches coletives de dötes les zones y di cambiamënć plü atuai ti seturs desvalis dl monn dl turism.
Le plann ne proibësc nia damperfora la poscibilité da valuté intervënć plü monüs, mo por chisc caji él preodü na prozedöra plü complicada por analisé la fatibilité y valuté i vantaji y i svantaji sides por ći che reverda l’ambiënt che la contrada y i vantaji por la sozieté y l’economia. „Les prozedöres nöies y la strotöra dl plan fajarà inće a na moda da podëi smendrì i tëmps de speta nezesciars por la valutaziun di proieć y da smendrì i intervënć de reparaziun“, à splighé inier le vizediretur dl Ofize Planificaziun dl teritore Giorgio Gottardi.
N’atra novité importanta é la partezipaziun di proprietars di terac bele tla pröma fasa dl prozès d’aprovaziun. La valutaziun di proieć gnarà efetuada dai medemi ofizi competënć sciöche tl tëmp passè. Le plann de setur nü é n resultat de n grup de laûr de rapresentanć de plü repartiziuns y ofizi dl’Aministraziun publica sciöche inće de istituziuns y organisaziuns esternes. L’elaboraziun dl plann é gnüda fata estlusivamënter cun ressurses dl’Aministraziun publica. Al jarà en forza do la publicaziun tl boletin dla Regiun de jenà 2015, al podarà gnì desćiarié tres la Rëi zivica y arà na valüta de diesc agn.
rc
