Atualità
Südtirol ToGo: L’app dla mobilité da śëgn inće por ladin
L’app SüdtirolToGo pîta na poscibilité d’informaziun pratica y asvelta sön i orars y i coliamënć dl trasport publich tl Südtirol. Te na manira scëmpla pon insciö chirì sön le fonin les informaziuns sön i orars, i tëmps de speta, les trasses y i coliamënć dejidrà: l’app „SüdtirolToGo“ é da püch gnüda ajornada cun les verjiuns ladines de Gherdëina y dla Val Badia.
Sön i libri stampà, tres l’internet y cun l’app nöia „Südtirol ToGo / Altoadige ToGo“: i anuzadus dl trasport publich tl Südtirol à plü poscibilitês da s’informè sön i orars, les trasses y i coliamënć dles corieres y dles ferates che zircolëia te Südtirol. „La chirida online y l'app é n vare inant che coliëia le sorvisc dl trasport publich cun les formes nöies dla tecnologia y che po gnì adorades dai zitadins y dai ghesć prësc indlunch te na manira scëmpla cun le fonin y na conesciun internet“, spliga l’assessur por la mobilité Florian Mussner. Cun l’ativaziun dl orar da d’invern ai 14 de dezëmber él gnü integrè les döes verjiuns ladines, öna por badiot y por gherdëna, cun la poscibilité da anuzè l’app inće por ladin.
La app po gnì desciariada tlican sön: http://mobilitaetsagentur.bz.it/upload/suedtiroltogo/lad/. L'app nöia pò gnì desćiariada da internet por dötes les verjiuns de smartphone (sides por android co google y tosc inće por iphone). Le proiet dla app vëgn otimisé tresfora inće tres les segnalaziuns dles porsones che anüza le sorvisc. Tres la chirida él poscibl da inserì dui posć, un de partënza y n post final, por ciafè fora i coliamënć plü asvelć di mesi de trasport (che tol ite dötes les ferates y corieres locales tl Südtirol). Implü pon inće ciafè sön l'app informaziuns y na mapa interativa sön posć olache an po storje pro o trates che an mëss fà a pé por rové da na architada al'atra. L'app po inće gnì adorada por odëi le status dl cunt atual dl "Südtirol Pass".
Por düć chi che ne à nia n smartphone él inće poscibl da s’informè sön la plata internet www.suedtirolmubilta.info, olache al vëgn dè dant avisa i orars di mesi publics te döt le Südtirol y eventualmënter inće i trus che an mëss fà a pé da na staziun o da n'architada al'atra. „Implü vëgnel garantì n ajornamënt costant dla plata internet, che conzed insciö da s'informè sön les mudaziuns plü atuales di orars y dl trasport publich local tl Südtirol“, spliga l’assessur Florian Mussner. N’atra poscibilité por s’informè sön i orars é chëra tlassica tres le liber di orars, olache al é gnü injuntè les informaziuns de basa te düć trëi i lingać.
rc
