Atualità
Firma cun i fonds y les banches, le model „Sparagn por la Ćiasa“ po pié ia
La firma dles convenziuns danter la Provinzia cun i fonds de ponsiun y les banches da incö (23/12) é le segnal de start por l’atuaziun dl model „Sparagn por la Ćiasa“ che prevëiga n imprëst alisiré por la cumpra, la costruziun o le ressanamënt dla pröma ćiasa tres le sparagn complementar por la ponsiun. Le model sarà operatif ti pröms mëisc dl 2015.
Cun la firma dles acordanzes danter la Provinzia – en presënza dl presidënt dla Provinzia Arno Kompatscher y dl assessur competënt Christian Tommasini – cun i fonds dla ponsiun complementara convenzionà y les banches él pié ia incö (23/12) a Palaz Widmann le model „Sparagn por la Ćiasa“ tl Südtirol. L’acordanza cun i fonds dla ponsiun complementara y les banches à cherié la basa tecnica-aministrativa por l’atuaziun dl model, i proscims vari sarà la formaziun dl personal dles banches y l’informaziun ai zitadins dles poscibilitês nöies che ai à por la cumpra, la costruziun o le ressanamënt dla pröma ćiasa. Le presidënt Kompatscher à alzè fora la buna colaboraziun cun les banches y i fonds dla ponsiun, „n ejëmpl de partnership danter le publich y le privat tl interès di zitadins che é de gran aiüt por düć i zitadins, che ô se fà sö o cumprè na pröma ćiasa y che ne ne à nia azès ai contribuć tlassics por le frabiché abitatif alisiré.“
Le model “Sparagn por la Ćiasa“ ne é nia na sostituziun di contribuć tlassics por le frabiché abitatif alisiré mo na forma de sostëgn complementara dla Provinzia por la cumpra o la costruziun dla pröma ćiasa. La forma de sostëgn dl “Sparagn por la Ćiasa“ é ponsada dantadöt por i jogn y por i zitadins cun n davagn mesan, che à n davagn massa alt por podëi damanè n contribut publich y tl medemo momënt n davagn massa bas por podëi se cumprè n’abitaziun. „Finalmënter podunse pié ia cun chësc model, al é stè n percurs compliché inće deache chësta forma de sostëgn é la pröma de chësc vers tla Talia. Al é na forma de sostëgn implü che dëida les porsones da ciafè na ćiasa de proprieté, che tëgn cunt dles trasformaziuns dla sozieté y che aumentëia les garanzies por le dagnì sides por ći che reverda la cumpra dla pröma ćiasa co la ponsiun“, à recordè l’assessur Christian Tommasini.
Le model prevëiga n coliamënt danter l'imprëst alisiré por la cumpra, costruziun o ressanamënt dla pröma ćiasa y le sparagn por la ponsiun complementara. Concretamënter él la soma dl sparagn te n fonds dla ponsiun convenzionè che garantësc la poscibilité da avëi l’azès a domandes d’imprëst alisiré. Un di criters por fà domanda é l’iscriziun a n fonds de ponsiun convenzionè por almanco ot agn y na soma dla posiziun personala de contribut tl fonds de almanco 15.000 euro. Implü ne po le proponënt nia avëi sura 55 agn y mëss avëi la residënza por almanco cinch agn tl Südtirol. Le pröm vare por düć i interessà al imprëst sarà insciö la presentaziun dla domanda de na conzesciun de n imprëst pro na banca che sostëgn le model “Sparagn por la Ćiasa“. Daldô saràl la banca che controlëia l’ademplimënt di criters di proponënć, che valutëia le plann de finanziamënt y che stlüj jö le contrat sön l’imprëst a inom y por cunt dla Provinzia. La soma complessiva dl imprëst ne podarà nia ester plü alta co le dopl dla soma dl singul proponënt tl fonds ponsiun. Por ejëmpl sce la soma tl fonds dla ponsiun é de 40.000 euro, pol gnì conzedü n imprëst de 80.000 euro.
L’imprëst po gnì paié zoruch te döes formes. La pröma é la renviada dl’estinziun: tres chësta modalité vëgnel fat fora cun la banca la dorada dl imprëst, tratan chësta perioda vëgnel ma paié i fić. Le capital tut sö sciöche imprëst messarà ma gnì paié zoruch do la tomada dl imprëst. Le vantaje de chësta soluziun é che tratan la perioda dl imprëst pol gnì metü laprò capital tl fonds dla ponsiun y che na cuota (ćina le 30 porcënt) dla soma dl capital vincolè po gnì adorada por paié zoruch na pert dl imprëst. La secunda forma é le paiamënt a rates: l’imprëst vëgn conzedü te chësc caje sciöche n credit „normal“ che vëgn paié zoruch periodicamënter tres na soma fissa dl capital y cun i fić dla perioda concordada.
I vantaji dl model “Sparagn por la Ćiasa“ por i zitadins é: i paiamënć tl fonds complementar po gnì retrać fiscalmënter dal davagn complessif ćina l’arjunjimënt de na soma mascimala, la poscibilité d’azès a n imprëst dl “Sparagn por la Ćiasa“ dopl tan alt co le capital tl fonds dla ponsiun, le mantignimënt dla ponsiun integrativa y le paiamënt di cosć aministratifs dl’operaziun da pert dla Provinzia. Le presidënt dla Provinzia à recordè che la dotaziun iniziala dl fonds é de 20 miliuns de euro, mo che la Provinzia podess inće aumentè la soma di finanziamënć tl dagnì sce le model se desmostrass n suzés.
rc
Galaria dales fotografies
