Atualità
Junta provinziala: Pat de garanzia, Ćiasa dla solidarieté, elisocurs,Darwin
Le pat de garanzia é gnü confermè da pert dla Ćiamena di deputać. La Junta à tut sö incö cun sodesfaziun la noela. Implü à la Junta tut dezijiuns sön n contribut straordinar ala Ćiasa dla solidareté, sön le elisocurs y le mantignimënt di jori danter Balsan-Roma, do che la compagnia de fligri Darwin à desdit le contrat de sorvisc.
Pachet de stabilité
La lüm vërda al pachet de stabilité dl govern nazional inće da pert dla Ćiamena di deputać vëgn odü cun sodesfaziun dala Junta provinziala. "Le provedimënt é śëgn definitif - à splighé le presidënt Arno Kompatscher – y chësc comportarà inće la mudaziun fata fora dl titul VI dl Statut sön le pat de garanzia stlüt jö da Roma y Balsan sön le finanziamënt dl'autonomia. Döt chësc ne se lascia nia ma programè a na moda plü saurida nosc dagnì, mo stlüj inće fora d’atri intervënć da pert dl Stat a ćiaria dla Provinzia".
Ćiasa dla solidarieté
La Ćiasa dla solidarietè da Porsenù, che pîta alberch y sostëgn ales porsones che à debojëgn, ciafarà n contribut straordinar implü de 400mile euro. Chësta dezijiun él la junta provinziala che à tut incö (23 de dezëmber) por conzede da curì dötes les spëise di intervënć d’adatamënt strotorai dl frabicat. L'investimënt preodü de 1,5 miliuns de euro, gnarà curì cun le contribut dla Provinzia (500mile euro), na racoiüda de fonds (ćiamò 500mile euro), y na seria d’aćiontanamënć dla Ćiasa dla solidarietè (100mile euro) y le stanziamënt nü garantì da Palaz Widmann.
La Darwin lascia Balsan
"I à informè la Junta provinziala d’avëi ćiafè dala compagnia de fligri Darwin na lëtra, olache al vëgn lascè alsavëi la desdita dl contrat de sorvisc sön la linia Balsan-Roma pian ia dal mëis de messè dl 2015". Chësć é ći che le presidënt dla Provinzia Arno Kompatscher à lascè alsavëi tratan la conferënza stampa dl mertesc. Ai cronisć ti à Kompatscher splighé che ara se trata de "n avis che ai s’aspetâ, dantadöt porvia di problems albüs ti ultimi mëisc”. A vigni moda mëna le presidënt dl Südtirol messaji de crëta: "Al é bele na strategia por garantì la continuité dl sorvisc - à splighé Kompatscher - y ara gnarà presentada ćina de forà adöm cun le conzet general nü dl aeroport che ne prevëiga nia ma le mantignimënt dl coliamënt Balsan-Roma, mo inće d’atres novitês por ći che reverda i jori cuntra nord y la pert sön i charter".
Elisocurs
Le sorvisc de elisocurs tla Provinzia de Balsan gnarà garantì ćina le 2016 dal’assoziaziun „Elisocurs Südtirol“. „I ùn podü confermè impormò incö l’assegnaziun dl sorvisc de elisocurs te na manira definitiva, deache le Consëi dl Stat à refodè da püch valgügn recursc che é gnüs fać cuntra la deliberaziun dla Junta dl 2011 cun chëra che la Junta â surandè le sorvisc“, à splighé incö l’assessuria por la sanité Martha Stocker. Ćina śëgn êl l’assoziaziun „Elisocurs Südtirol“ che garantî le sorvisc te na gestiun provisoria, por merit dla sëntenza dl Consëi dl Stat él la Junta che à podü ti surandè incö al’assoziaziun „Elisocurs Südtirol“ le sorvisc te na manira definitiva ćina le 2016.
rc
