Atualità
Dai 7 de jenà: Iscriziuns online por l’ann de scora 2015-16
Cun le scomenciamënt dl’ann nü saràl poscibl da fà les iscriziuns por l’ann de scora 2015–16 online cun la cherta di sorvisc. Dai 7 de jenà dl 2015 é les iscriziuns davertes por les scores elementares de düć trëi i grups linguistics, tl mëis de forà podaran fà chëres por les scores altes talianes y te merz por les scores altes ladines y todësces y por chëres profescionales.
Le sorvisc d’iscriziun online é na novité che porta para plü vantaji por les families, che po fà l’iscriziun por la pröma tlassa dla scora elementara, alta y profescionala diretamënter dal computer de ćiasa tres la cherta dl zitadin. L’iscriziun online ne é nia preodüda por la pröma tlassa dles scores mesanes, deache l'iscriziun vëgn efetuada automaticamënter, sciöche inće por i agn do l’iscriziun ala pröma tlassa dla scora elementara, mesana y alta.
Por l’ann scolastich 2015/16 ne é l’iscriziun online nia d’oblianza, mo al é n sorvisc debann che vëgn pité en alternativa al’iscriziun sön papier che an po tres ćiamò fà y che romagn varënta. Por s'anuzé dl sorvisc d’iscriziun online val debojëgn da ativé denant la cherta di sorvisc te un di Comuns dl Südtirol ((www.provincia.bz.it/cartaservizi/attivazione.asp)
Dai 7 ćina ai 25 de de jenà dl 2015 saràl poscibl da fà l’iscriziun online por l’ann de scora 2015/16 por la pröma tlassa dla scora elementara de düć trëi i grups linguistics. Tla pröma tlassa dla scora elementara mëssel gnì scrit ite dötes les mitans y düć i mituns che complësc i 6 agn ćina ai 31 de agost dl 2015. Implü pol gnì scrit ite dötes les mitans y düć i mituns che complësc i sis agn ćina ai 30 de aurì dl 2016.
Les iscriziuns online por la pröma tlassa dles scores altes cun le lingaz d’insegnamënt talian po gnì fates dai 3 ai 28 de forà 2015.
Les iscriziuns online por la pröma tlassa dles scores altes ladines y todësces sciöche inće por dötes les scores profescionales po gnì fates dai 3 ai 31 de merz dl 2015.
Inće por l’iscriziun a scores privates él poscibl da s’anuzè dl sorvisc online che ne é nia atif por l’isciriziun tles scolines, por la formaziun da lernerat y por les scores de musiga.
Iscriziuns online y informaziuns:
rc
