Atualità
Kompatscher y le 2014:Manco burocrazia, plü trasparënza y alisiraziuns(1/3)
„La politica n'à nia le compit da ciafè soluziuns ai problems individuai, ara mëss indere cheriè les condiziuns de cornisc por che les porsones ais la poscibilité da s’organisé süa vita te na manira responsabla“: le presidënt Kompatscher à metü man incö (28/12) cun chësc pinsier so discurs por la fin dl’ann, te chël che al à nominè les alisiraziuns sön les tasses sciöche na mosöra arjunta tl 2014.
En ocajiun dla fin dl’ann à le presidënt dla Provinzia Arno Kompatscher invié incö, lönesc ai 29 de dezëmber, i rapresentanć di media te süa sënta a Palais Widmann por na suraodüda generala dl pröm ann de laûr dla Junta provinziala nöia. Le presidënt Kompatscher ne à nia odü chësta incuntada sciöche n’ocajiun por cumpedè sö avisa döt ći che é sozedü te chisc dodesc mëisc, mo sciöche n’ocajiun de presentaziun dla direziun politica en general che é stada ala basa dl program de laûr dl govern südtirolej tl 2014.
Tl scomenciamënt de so ressumé à le presidënt dla Junta nominé i alisiramënć por les families y les aziëndes sciöche inće les mosöres de sostëgn che la Junta provinziala à realisé tl 2014. „Les döes tematiches dles alisiraziuns y dl sostëgn é gnüdes metüdes volontariamënter al zënter dl laûr dl pröm ann dla Junta, inće deache le svilup dl'economia te Südtirol, tla Talia y te döt Europa é malsigü“, à dit Kompatscher. Insciö él gnü metü a desposiziun da pert dla Junta provinziala zirca 170 euro al mëis por indöt 1600 pensionisć cun la ponsiun minimala, implü él gnü elaborè le contribut por i afić y aumentè de 80 euro al mëis por chi che tira sö i mituns da susc, al é gnü conzedü 10 miliuns de euro por antizipaziuns de restrotoraziuns y ponü la basa por le start dl conzet de „Sparagn por la ćiasa“ che é tla fasa de start y che piarà ia ti pröms mëisc dl 2015. „Inultima él ćiamò gnü aprovè reduziuns sön les tasses de indöt 250 miliuns a bëgn di zitadins y dles aziëndes y che reverda reduziuns de 55 miliuns pro Cuta comunala imobiliara CCI (GIS/IMI), de 75 miliuns pro l’IRAP y dl’introduziun dla no-tax-area pro l’IRPEF, che à portè para na reduziun de 33 miliuns de euro“, à recordè Kompatscher.
Tl cheder dles alisiraziuns à le presidënt dla Provinzia inće nominé le smendrimënt dla burocrazia y l’inovaziun dl’aministraziun publica: „Ala basa dla reduziun dla burocrazia ùnse metü la reforma generala dl’aministraziun publica. Chësta reforma ne po nia gnì realisada da un n dé al ater, mo al é n proiet che jarà inant ćina le 2018, deache al é debojëgn de na reorganisaziun di sorvisc dal’intern dl aparat aministratif y chësta prozedöra à debojëgn de tëmp y de n’analisa detaiada.“ Por ći che reverda les alisiraziuns burocratiches à Kompatscher inće sotligné la scemplificaziun pro la surandada de inćiaries che gnarà regolamentada danü tres na lege nöia sön i apalć tl 2015: „I ùn bele fat vari importanć tl 2014, sciöche por ejëmpl pro l’assegnaziun de inćiaries. Ćina dan da püch êl vigni singul partezipant che tolô pert a na bandida de n concurs che messâ documentè süa candidatöra, śëgn él ma plü le davagnadù che messsarà dè jö düć i documënć pro la sotescriziun dl contrat.“
N’atra arjunta importanta che le presidënt dla Provinzia Arno Kompatscher à sotrissé incö tl setur dl’aministraziun é la daurida di consëis d’aministraziun y de verda sciöche inće le start de n dialogh davert cun dötes les perts interessades, dai partners soziai ai seturs interessà. „La reforma dla sanité, l’orientamënt nü dl sostëgn al’economia, i dialogs sön la formaziun y les leges omnibus à portè para mudaziuns de gran dimenjiuns por ći che reverda la partezipaziun ai prozesc de dezijiun. Nosc impëgn é stè chël da integrè dötes les perts te na discusciun ampla bele tla pröma fasa dles propostes de lege“, à sotligné Kompatscher.
rc
