Atualità
Kompatscher sön le 2014: Dal’economia ćina al ambiënt (2/3)
N sostëgn maiù al’archirida y la reforma dl sostëgn dl’economia é stades por le presidënt Kompatscher döes dles prioritês tl setur dl’economia tl ann passè, un di punć prinzipai dl’agenda tl setur dl ambiënt é stè indere l’aprovaziun dles diretives sön l’adoranza di produć fitosanitars. Implü él gnü renové tl 2014 le contrat de sorvisc cun Trenitalia y portè inant la fujiun danter SEL y AEW.
Al pröm post te so ressumé dl setur dl’economia à le presidënt dla Provinzia Arno Kompatscher metü incö (29/12) i dui seturs dl’archirida y dl’inovaziun. „Te chisc dui seturs ùnse albü debojëgn da recuperé y porchël à la Junta fat vari inant“, insciö Kompatscher che à recordè che i mesi finanziars a desposiziun é gnüs aumentà de set miliuns en confrunt al 2014 y che le conzet por le parch tecnologich é gnü aprovè do n’elaboraziun y cun le consens dl consorz di impresars. Implü él gnü introdüt dala Junta la promoziun dl'assunziun de personal cualifiché cun na formula de sostëgn tres „i investimënć di ćes“.
Le presidënt dla Provinzia à sotligné inant n ater vare important tl setur dl’economia y che é stè le dialogh cun le setur turistich tres chël che al é gnü garantì le finanziamënt tl setur dl turism. „I sun cosciënt che le finanziamënt dl turism é na chestiun zitia, olache al ne é nia saurì da ciafè n consens ampl. Impò sunse stà bugn da ciafè na concordanza cun dötes les organisaziuns y istituziuns interessades por ći che reverda le model di trëi pilastri partis sö danter la tassa locala, le sostëgn dala man publica y i contribuć volontars. Śëgn gnaràl analisé a funz les propostes, dal 2016 dess le conzet gnì atué“, insciö Kompatscher.
Öna dles prioritês dl 2014 che le presidënt dla Junta à nominé incö é stè le sostëgn dl’economia che é gnü renforzè tres l'azès al fonds de rotaziun, cun n program de svilup di raiuns rurai y tres la fujiun danter BLS, EOS, SMG y TIS che deventarà na aziënda sòra. Inće por ći che reverda la tematica dl fonds sozial europeich (FSE) à recordè Kompatscher che „do i gragn problems che i ùn albü sunse stà bugn da laurè fora na strategia por le dagnì y le program dal 2014 al 2020.“
Por ći che reverda le sostëgn al’economia à Kompatscher sotligné implü che la Junta provinziala à aprovè n program dles infrastrotöres publiches por i proscims cater agn. „Insciö unse definì les prioritês por la realisaziun dles infrastrotöres y di laûrs publics ćina le 2018. Cun l’aprovaziun de n program plurianual él poscibl da programè avisa i investimënć y chësc ti dà inće plü segurëza tla planificaziun ala Provinzia, ai Comuns y ales aziëndes.“ La Junta provinziala à aumentè tl 2014 i mesi finanziars por la Repartiziun Infrastrotöres (de indöt 52 miliuns) y dla Repartiziun Sorvisc Strades (de indöt 92 miliuns). Tl ann 2014 él inće gnü dè le start por le proiet dl areal dla staziun dla ferata a Balsan y an é jüs inant cun i laûrs de realisaziun dl tunel de basa dl Prener. Cun le capolüch da Balsan él gnü fat vari importanć por la planificaziun y la realisaziun dla zirconvalaziun.
Tl setur dla mobilité - à sotligné le presidënt dla Provinzia - él gnü renovè le contrat de sorvisc cun Trenitalia che contëgn la cumpra de set ferates nöies FLIRT zënza cosć ajuntifs. La Junta provinziala é jüda inant tl 2014 cun les tratatives por surantò la linia dla ferata da Balsan a Maran. „Cun la surantuta dla linia da Balsan a Maran y l’eletrificaziun dla linia dla Val Venosta sarà la rëi dla ferata südtiroleja ćiamò plü moderna cun vantaji por i pendolars, zitadins y ghesć“, insciö Kompatscher. Por ći che reverda l’aeroport da Balsan à Kompatscher sotligné che „n aeroport che funzionëia ti porta vantaji sides al turism co ai zitadins y ala posiziun dl Südtirol sciöche post por la sënta de aziëndes che à debojëgn de coliamënć internazionai. La Junta provinziala à stabilì i obietifs che le conzet nü dl aeroport messarà avëi y che reverda l'aumënt dl anuzamënt di jori, la maiù soportanza ambientala poscibla, n coliamënt cun Roma, tl Nord y da destinaziuns turistiches."
Mosöres por la sconanza dl ambiënt sön la trassa dl Prener, le paiamënt di fonds ambientai y l’aprovaziun dles diretives sön l’adoranza di produć fitosanitars é stà por les presidënt Kompatscher trëi mosöres importantes che la Junta à stabilì tl setur dl ambiënt. „Le referendum a Mals à metü en pü tl'ambria les diretives nöies che la Junta à aprovè, indere él le Südtirol che tol ite, tres chësta dezijiun, na funziun de percursus tla Talia tl’adoranza di produć fitosanitars“, à recordè le presidënt Kompatscher.
Inće tl setur dl’energia à la Junta provinziala nöia metü a jì soluziuns por l’energia y l’ambiënt: al é gnü laurè fora na proposta de lege por de pices derivaziuns idroeletriches y por chëres mesanes, al é gnü tratè la cumpra dles cuotes ENEL pro i gragn implanć idroeletrics y al é gnü fat vari inant tla direziun de na fujiun danter SEL y AEW. Por ći che reverda la fujiun dles döes sozietês à Kompatscher dit che al é sigü "che al sarà poscibl da stlü jö positivamënter les tratatives de fujiun, inće deache la creaziun de na sozieté unica é n vantaje sides por les aziëndes, co por le bilanz publich y dandadöt por i zitadins.“
rc
