Atualità
La Biblioteca provinziala Teßmann presentëia libri premià
La Biblioteca provinziala Dr. Friedrich Teßmann presentëia inće chësc ann l’AudioBar tla Ćiasa dla Cultura Walther von der Vogelweide a Balsan, olache an po ascutè sö y se dè jö cun n'oferta ampla de libri audiovisifs por mituns, jogn y porsones adultes che é gnüs premià tl 2014. La mostra sarà daverta dai 17 de jenà ai 11 de forà dl 2015.
Por la mostra "Monns di libri" (Bücherwelten) tla Ćiasa dal Cultura dl Waltherhaus él gnü chirì fora chësc ann deboriada cun l'ofize linguistich dl Südtiroler Kulturinstitut na ligna de libri audiovisifs por mituns y mitans, jogn y jones y porsones adultes che è gnüs premià tl 2014 cun pesć plü desvalis. I libri chiris fora é gnüs valutà da na iuria de comëmbri esperć y independënć: operes importantes dl'ert dl baiè, dl’intermediaziun interessanta dl savëi y di valurs o scemplamënter ma operes plajores por dötes les porsones che lî ion.
En chësta ocajiun dla presentaziun de valgönes dles operes premiades tres la scomenciadia "Monns di libri" dl Waltherhaus él inće chësc ann la Biblioteca Provinziala Dr. Friedrich Teßmann che arjigna indô ite l'AudioBar, olache al ti vëgn pité la poscibilité ai vijitadus da ascutè sö valgügn tesć di libri. Por vigni liber audiovisif pon ascutè sö ejëmpli de tòć, indöt sura 200 ores. I libri auditifs premià por porsones adultes fej pert dl inventar dla Biblioteca Provinziala Dr. Friedrich Teßmann, chi por mituns y mitans é gnüs cumprà dal Ofize Biblioteches y letöra, y metüs a desposiziun por l’AudioBar.
La mostra vëgn daurida ai 16 de jenà dl 2015 dales 18.00 tla Ćiasa dla Cultura Walther von der Vogelweide a Balsan y resta daverta dai 17 de jenà ai 11 de forà, dal lönesc ala sabeda tres dales 9.00 ales 18.00.Do la fin dla mostra pon s’imprestè fora i libri presentà tla Biblioteca Provinziala.Por plü informaziuns: http://www.tessmann.it/la/home.html.
rc
