Atualità
Proteziun zivila: Schuler à sotescrit la convenziun cun la Crusc Blanćia
L’assessur por la Proteziun zivila Arnold Schuler à firmè sön inćiaria dla Provinzia n’acordanza nöia cun le presidënt dla Crusc Blanćia Georg Rammlmair por le renovamënt dla convenziun por la gestiun dl sorvisc d’assistënza ti caji d’emergënza y de catastrofes naturales, do che chëra da denant é tomada ai 31 de dezëmber dl 2014.
„Sciöche responsabl dl setur dla proteziun zivila tla Junta provinziala – à sotligné l’assessur por la proteziun zivila Arnold Schuler - me fêjel dër ligrëza da odëi sciöche dötes les perts dl sistem de socurs y de pröm aiüt laôra adöm y i oress rengrazié düć canć por so contribut, gonot sön basa volontara, che va a bëgn dla popolaziun südtiroleja“. Adöm al diretur de Departimënt Klaus Unterweger é l’assessur Schuler jü a ti ćiarè ala zentrala dla Crusc Blanćia a Balsan, olache al à incuntè le diretur dla Crusc Blancia Ivo Bonamico, so sostitut Reinhard Mahlknecht, le presidënt Georg Rammlmair y süa sostituta Barbara Siri. Te chësta ocajiun él gnü sotescrit la convenziun nöia danter la Provinzia y l’assoziaziun de socurs por la surantuta dl sorvisc d’assistënza cun intervënć de prescia te caji d’emergënza y de catastrofes naturales dal 2015 al 2017. Chësta acordanza reverda l’atuaziun de n plann ampl de intervënt ti caji de emergënza y de catastrofes naturales, danter l’ater cun la realisaziun de albercs d’emergënza, la sistemaziun y assistënza dla popolaziun y dles unitês d’intervënt te situaziuns d’emergënza cun spëises y material de pröm aiüt.
Tres l’acordanza sotescrita él la Provinzia che ti surandà ala Crusc Blanćia la gestiun dl sorvisc d’assistënza sciöche unité spezialisada dl Sorvisc de proteziun te situaziuns d’emergëza y de catastrofes naturales. Le setur dla Proteziun zivila tla Crusc Blancia à süa postaziun zentrala a Balsan, unitês che se crüzia de intervënć de prescia é inće presëntes a Bornech, Sterzing, Porsenù, Lana, Egna, Naturns tla Val dl Sarnthein y tla Val d’Adesc; unitês d’intevënt de prescia speziales (SEG) de diesc porsones é presëntes a Bornech y Schlanders. Le sorvisc d’assistënza assigurëia i sorvisc de assistënza ales porsones che adora aiüt y che é romagnüdes zënza abitaziun, l’assistënza y i aiüć ales unitês d’intervënt, la converjiun te albercs de emergënza de strotöres che é bele (scores, sëntes de assoziaziuns) y la realisaziun de tendes por aćiampè les porsones y container che po gnì adorà schiöche albercs d’emergënza.
Tres la convenziun nöia él le sorvisc d’assistënza che mëss garantì 24 ores sön 24 na prozedöra cun chëra che al vëgn metü a desposiziun, te caji d’emergënza y cun na preparaziun de trëi ores, almanco 1000 cëis ćialć y boandes zënza alcol por na dorada minima de 24 ores. Cun na preparaziun de 12 ores mëssel gnì garantì n gostè y dui cëis ćialć al dé por 1600 porsones por almanco 10 dis. Por che le sorvisc d’assistënza pois gnì ativé mëssel ester almanco 100 porsones tocades dal’emergënza sciöche inće ti caji che la Proteziun zivila dla Provinzia vëgn inćiariada da intergnì cun n intervënt spezifich. I intervënć po ester de dorada cörta y zënza tëmp de preparaziun (sciöche tl isté 2012 do la rô tla val de Fleres) o po gnì arjignà ca do n tëmp de preparaziun plü lunch (sciöche do le tremoroz a L’Aquila tl 2009).
Cun l’acordanza cun la Provinzia vëgnel curì zirca le 50 porcënt dles spëises dl setur Proteziun zivila tla Crusc Blanćia, la pert di cosć che resta vëgn finanziada dal’assoziaziun de pröm intervënt diretamënter tres contribuć di mëmbri y dl cinch por mille. La Junta provinziala à aprovè la convenziun cun la Crusc Blanćia te süa sentada da denant cun n contribut anual de 150.000 euro por i proscims trëi agn. Le contribut romagn insciö le medemo sciöche i cinch agn da denant.
rc
Galaria dales fotografies
