Atualità
Tlausöra dla Junta: Reorganisaziun dl’aministraziun y energia
L’organisaziun nöia dl’aministraziun provinziala y dl setur dl' energia é stà i temesc prinzipai dla tlausöra dla Junta provinziala, che é gnüda stlüta jö incö da misdé. Tratan la tlausöra él inće gnü stabilì les tematiches zentrales dl’ativité ti proscims mëisc cun danter l'ater: le plann de performance, la fujiun SEL-AEW, la lege sön le personal y la promoziun dla leteratöra ladina.
Na planificaziun daldöt nöia y che renovëia completamënter la prozedöra dla formulaziun dl bilanz provinzial – meton man daimpröma dai obietifs y dales prestaziuns por passè daldô ales ressurses - y la reorganisaziun dl setur local dl’energia por aumentè la competitivité y le sorvisc por i zitadins: chëstes é stades les döes gran tematiches – adöm al plann dles prioritês dla Junta por i proscims mëisc – dl’incuntada dla Junta provinziala che à metü man inier (08/01) y che se é rovada incö da misdé, vëndres ai 9 de jenà, cun la presentaziun di resultać prinzipai te na conferënza stampa dl presidënt dla Junta Arno Kompatscher adöm ai assessurs y ales assessuries.
Plann de performance sciöche basa por le bilanz de previjiun y dl’aministraziun
L’atuaziun dl plann de performance sciöche basa programatica dl bilanz de previjiun é por le presidënt dla Provinzia Arno Kompatscher na „revoluziun copernicana“, dantadöt por ći che reverda le percurs de creaziun dl bilanz de previjiun: „Ćina śëgn gnô le bilanz provinzial metü adöm sön la basa dles informaziuns sön les entrades y les spëises. Tl dagnì gnaràl naôta stabilì i obietifs y formulè les prioritês dl bilanz. Sön la basa dla definiziun di obietifs gnaràl spo partì sö les ressurses finanziares.“
Cun le plan de performance él la Junta provinziala che mët en pratica n stromënt de planificaziun strategica che pëia ia dal prinzip che les aministraziuns publiches é aziëndes che prodüj sorvisc y prestaziuns. Por che le plann de performance pois gnì atuè él vigni repartiziun y ofize che messarà valuté i sorvisc y les prestaziuns te na manira critica. „Te chësc vers n’é le plann nü nia ma la basa por le bilanz de previjiun mo inće n stromënt de analisa critica dles prestaziuns che vëgn pitades y insciö la fondamënta por mëte le bilanz de previjiun a zero“,insciö Kompatscher.
Insciö sarà dötes les repartiziuns y düć i ofizi che messarà analisé te na manira critica i sorvisc y les prestaziuns che vëgn pitades. Sciöche pröm critêr messaràl gnì valuté les prestaziuns nezesciares por l’arjunjimënt di obietifs, te n secundo momënt saràl spo da cuantifiché les ressurses finanziares nezesciares por respetè i standarg de cualité y te n terzo momënt gnaràl spo valuté ći organns che é i plü adatà por pité i sorvisc (la Provinzia, i Comuns, i privać). Inultima messaràl gnì planifiché les modalitês por portè a fin le laûr tla manira plü efiziënta y asvelta poscibla. Pro l'atuaziun dl plann de performance tolarà la Provinzia de Balsan en conscidraziun les esperiënzes dles atres regiuns europeiches, dantadöt les esperiënzes dl Ćiantun svizer de Aargau, „olache le bilanz de previjiun é ma plü na chestiun tecnica por mirit dl plann de performance che é n stromënt che vëgn metü en pratica te döta l’Europa “, insciö Kompatscher.
Fujiun Sel-Aew
La reorganisaiun tl setur energetich tl Südtirol é stada n’atra tematica che à ciafè tröpa lerch tratan la sentada straordinara dla Junta: insciö ti él gnü presentè ala Junta les analises de natöra tecnich-economica dla fujiun danter l’aziënda provinziala dla SEL y l’AEW (Etschwerke AG) y la dimenjiun de chësta operaziun por le teritore y por la popolaziun. Le manager finanziar dla SEL Paolo Vanoni à presentè n ressümê sön i resultać dles consulënzes internazionales che à portè a löm plü argomënć che se basëia sön l’analisa de dać y dles statistiches che reverda les conseguënzes dla creaziun de sinergies, sön davagns poscibli, sön posć de laûr y sön la competitivité. La Junta provinziala à aprofondì i proscims vari por la fujiun danter SEL y AEW y à confermè che chësta fujiun é na pera miliara fondamentala por le Südtirol. En acordanza cun i Comuns de Balsan y Maran déssel gnì tut les dezijiuns nezesciares por na fujiun ćiamò tl mëis de jenà.
Proposta de lege sön le personal: I contignüs é definis, aprovaziun preodüda por en mertesc
La Junta provinziala s’à acordè tratan la tlausöra sön i contignüs dla lege nöia sön le personal. „I se ùn dè jö cun chësta tematica bele da plü edemes, y insciö él stè nezesciar da podëi la tratè n iade te na manira plü detaiada“, à splighé le presidënt dla Provinzia Arno Kompatscher. L’assessuria por l’aministraziun publica Waltraud Deeg à sotligné che la tlausöra é inće stada na buna ocajiun por tratè la proposta de lege nöia tla Junta deache le personal é na componënta che reverda plü seturs. L’assessuria à daldô presentè i punć prinzipai dla proposta de lege.
Insciö é un di fins prinzipai dla lege la creaziun de na cornisc che sides buna da respogne ales mudaziuns tla sozieté. „Cun la proposta de lege nöia orunse porvè da ciafè y anuzé les sinergies danter i jogn y i manco jogn, danter l’esperiënza y les idees nöies“, insciö Deeg che à sotligné che cun la lege sön le personal déssel gnì metü la fondamënta y les condiziuns nezesciares por pormëte la mudada dles generaziuns tl’aministraziun publica. N’ater punt important dla proposta de lege nöia é la regolamentaziun dla mobilité di impiegać de düć i livì tl’aministraziun publica che dess portè inće a na organisaziun nöia dl’aministraziun. L’assessuria Deeg à sotligné implü che al ne dess nia jì a perde inće la funziun soziala dl’aministraziun publica. „I orun deventè plü efiziënć, mo i orun inće ti garantì tl dagnì na seria de posć ales porsones che se fej ert sön le marćé dl laûr y che é te situaziuns de vita nia saurides“, insciö l’assessuria che à ajuntè che te chësc contest él preodü la creaziun de 40 posć de laûr ajuntifs che dess gnì metüs a desposiziun a porsones cun handicaps. L'aprovaziun dla proposta de lege da pert dla Junta provinziala é preodüda por en mertesc, ai 13 de jenà.
Promoziun y defujiun dla leteratöra ladina
Por ći che reverda la cultura ladina él stè l’assessur por la scora y cultura ladina Florian Mussner che à portè dant sciöche öna dles prioritês por i proscims mëisc la promoziun y la defujiun dla leteratöra ladina y dla leteratöra por i jogn. Cun la publicaziun de operes leterares tres concursc de leteratöra él stè l’Assessorat por la scora y cultura ladina che à sostignì cun plü scomenciadies ti ultims agn la promoziun y defujiun dla leteratöra ladina. „La promoziun dla produziun leterara ladina gnarà renforzada tl dagnì cun mosöres che jarà a bëgn di auturs, traduturs, leturs y dl publich potenzial dles operes leterares y dles traduziuns nöies“, à sotligné l’assessur por la cultura ladina Florian Mussner. Por ći che reverda le sostëgn dla leteratöra por jogn él preodü sciöche mosöres de sostëgn la traduziun tl ladin de döes operes dla leteratöra mondiala por jogn al’ann. „Al ne é nia ma preodü la traduziun dles operes mo inće n program de presentaziun y de spartiziun dles traduziuns che dess insciö gnì presentades a n publich ampl por ti dè na sbürla de motivaziun ai jogn da s'interessè por le lingaz dla uma y por renforzè les conescënzes sön la leteratöra y publizistica ladina,“ insciö Mussner.
Agenda politica
Tratan la sentada dla„tlausöra“ él stè vigni assessur y vigni assessuria che à presentè les tematiches prinzipales te „sü“ seturs por i proscims mëisc y che é ma na pert dl program dles ativitês dl govern provinzial. Chësc inće por ti dè la poscibilité al presidënt Kompatscher da concordè le calënder por i laûrs – dantadöt por ći che reverda i dessëgns de lege - cun l’Ofize dla presidënza dl Consëi provinzial. La lista cun dötes les prioritês é gnüda injuntada.
rc
Galaria dales fotografies
