Atualità
Provinzia rezepësc reduziun IRAP statala: alisiramënć de 88 miliuns de euro
Dl 2015 paiarà les impreses dl Südtirol zirca 88 miliuns de euro de manco de IRAP: chësc por mirit dl arbassamënt dla basa imponibla IRAP che la Provinzia – sön proposta dl presidënt Arno Kompatscher – ô rezepì daldöt dala normativa preodüda a livel statal.
La lege de stabilité dl Stat vëiga danfora che les impreses pois trà jö tl dagnì dala basa imponibla IRAP i cosć por i lauranti a tëmp indeterminé. "Na mosöra che alisirëia le pëis fiscal dl'impresa mo che comporta inće de mëndres entrades por i bilanc publics", sotrissëia le presidënt Arno Kompatscher. Aladô di cunć fać dala Repartiziun Finanzes gnaràl registrè tres chësta mosöra tl Südtirol 88 miliuns de euro de manco de entrades. Porchël orô la Junta aumentè n pü’ les alicuotes IRAP provinziales.
Le Presidënt recorda che le Südtirol aplichëia alicuotes IRAP cotan plü basses co le rest dl teritore nazional. Mo inće tl dagnì messel romagne insciö, spezifichëia Kompatscher. La Junta ne adorarà nia la poscibilité metüda ite dala lege finanziara d’aumentè l'IRAP: "Al gnarà apliché inće por les impreses dl Südtirol la reduziun fiscala preodüda dala lege de stabilité dl Stat", anunziëia Kompatscher. La proposta spezifica gnarà dada jö doman tla sentada de Junta.
En concret: dl 2015 romagn la alicuota "normala" IRAP tl Südtirol – sciöche preodü tl pachet di alisiramënć fiscai dla Junta ales impreses – dl 2,68%, la basa imponibla vëgn arbassada por mirit dla detraziun di cosć por lauranć tuć sö a tëmp indeterminé. "Di alisiramënć IRAP podarà s’anuzé dötes les impreses dl Südtirol, dantadöt chëres che garantësc posć de laûr stabii", stlüj jö le Presidënt, che vëiga l’alisiraziun sciöche n contribut por renforzè la competitivité dl'economia locala y n impuls.
USP
