Atualità
Azesc internet: Le Südtirol é precursur
Le Südtirol alda pro les arees plü digitales dla Talia y é ćinamai al pröm post por ći che reverda i azesc internet dles families (73,4%): chisc é i dać che vëgn presentà dales inrescides nöies dl ISTAT sön l’adoranza dles tecnologies modernes de comunicaziun: „L’adoranza dl internet é aumentada de valgügn punć prozentuai en relaziun al 2014“, sotlignëia l’assessuria provinziala Waltraud Deeg.
Tl Südtirol él indöt 7 families sön 10 (73,4%) che é online, en confrunt al valur mesan dla Talia che é de 64 porcënt. Les inrescides ajornades dl ISTAT constatëia inće che l’internet vëgn adorè dantadöt sciöche fontana d’informaziun y meso de comunicaziun. Al crësc inće la perzentuala de porsones che adora l’internet por fà cumpres onlines y por i raporć cun les istituziuns y i ofizi. L’aministraziun digitala (e-government) à te chësc contest na funziun tres plü grana, „cun le obietif da scemplifiché tres deplü la vita da vigni dé di zitadines y dles aziëndes“, sotlignëia l’assessuria provinzia Waltraud Deeg che recorda che tl Südtirol él bele śëgn le 90 porcënt dles aziëndes che s’anüza di sorvisc online dl’aministraziun publica.
Le potenziamënt dl’aministraziun digitala é na ghiranza che fej pert dl prozès d’elaboraziun dl plann plurianual de svilup „Südtirol digital 2020“: „I sun tl laurè sön les propostes registrades tres le prozès de partezipaziun dl plann por stabilì i proscims vari. Nosc obietif é chël da ampliè i sorvisc online y da alisiré ćiamò deplü l’azès ai zitadins“, insciö Deeg che à confermè l’intenziun da orëi presentè i pröms resultać dles consultaziuns „Südtirol digital 2020“ ala fin dl mëis de jenà.
Tl confrunt vëgnel confermè a livel nazional la desferënzia danter le nord y le süd, implü él i dać che presentëia na mioraziun dla dotaziun tecninca, dla conesciun dl banda leria, dl azès internet tres aparać mobii y dla racoiüda de dać tres les clouds. Tres les consultaziuns cun i esperć y i utënć él gnü fora che „cun la tecnologia dla comunicaziun y dl’informaziun podunse miorè i sorvisc por i zitadins“, spliga l’assessuria. Implü él l’azès y les competënzes da adorè i mesi de comunicaziun che ampliëia les posicibilitês d’anuzamënt tla vita da vigni dé: „Les informaziuns y i sorvisc online po insciö gnì adorà por laûr, por dè jö pratiches burocratiches y por i contać soziai“, stlüj jö l’assessuria Deeg.
I dać dl stüde che reverda le Südtirol gnarà metüs a desposiziun te cört tëmp dal Istitut provinzial de statistica dl ASTAT. Le stüde ISTAT é desponibl online sön: http://www.istat.it/it/archivio/143073 .
rc
