Atualità
Prozedöra de seleziun por le diretur general nü dl Aziënda sanitara
La Junta provinziala à azetè incö (13/01) les dimisciuns de Andreas Fabi sciöche diretur general dl’Aziënda sanitara dl Südtirol. Contemporaneamënter él gnü aprovè la prozedöra por la seleziun por la nominaziun dl diretur general nü.
Ai 21 de novëmber dl 2014 à Andreas Fabi anunzié sües dimisciuns sciöche Diretur general dl’Aziënda sanitara provinziala, che é gnüdes formalisades. „Incö à la Junta provinziala azetè les dimisciuns de Andreas Fabi – à splighé le presidënt Kompatscher - y tl medemo momënt metü da jì la prozedöra de seleziun por chirì fora le diretur nü.“ Insciö él gnü definì les carateristiches che i candidać mëss avëi por presentè domanda: ne avëi nia superè i 65 agn, avëi na laurea, na laurea spezialistica o n master universitar de pröm livel, avëi n’esperiënza de almanco cinch agn de sorvisc efetif sciöche suranstant de n ënt, de na strotöra publica o tl setur privat.
Tla prozedöra él inće gnü definì les competënzes che ti gnarà damanades ai candidać: competënzes spezialistiches (danter chëstes strategia, planificaziun tl setur sanitar, colaboraziun extraregionala, gestiun dl budget y dl personal), competënzes personales y soziales (leadership, capazité da tó dezijiuns, de bunes competënzes de comunicaziun, capazité de gestiun te situaziuns de stres y gestiun di cosć), capazitês de management y de gestiun de aziëndes sanitares, tl controlling y tl management de situaziuns de conflić.
Les domandes de amisciun ala seleziun messarà gnì presentades alplü tert 30 dis do la publicaziun dla bandida tl Boletin ofizial dla Regiun. „L’obietif é chël da avëi na seria ampla de candidać, insciö ne gnarà la prozedöra nia ma publicada tl Boletin dla Regiun mo inće tla Gazëta ofiziala dla Republica y te folieć da vigni dé tla Talia, tla Germania y tl’Austria, sön la homepage dla Provinzia y sön chëra dl’Aziënda sanitara“, à ajuntè le presidënt dla Provinzia Arno Kompatscher.
L’Ofize Organisaziun dla Provinzia se fistidiarà dla prozedöra de seleziun. Na comisciun spezifica gnarà inćiariada cun l’ejaminaziun preliminara dla documetaziun dles candidatöres por mëte daldô man cun la prozedöra. Pro düć i candidać gnaràl valuté les esperiënzes profescionales y i curriculums por podëi ti mëte dant ala Junta candidać abilità ala nominaziun dl diretur general nü.
rc
Galaria dales fotografies
