Atualità
Contribuć por i pendolars: al po gnì presentè domanda - Aretrać paià fora
Da atira inant y ćina ai 31 de merz dl 2015 pol gnì presentè domanda por contribuć de spëises de iade por l'ann 2014. Implü él stè meso da paiè fora i aretrać pro i contribuć di pendolars abinà sö ti ultimi agn. "La Junta provinziala à metü a desposiziun l'ann passè feter 5,5 miliuns de euro implü por paiè fora i aretrać", recorda l'assessur por la mobilité Florian Mussner.
Do che al é gnü laurè fora danü les condiziuns d'azès ai contribuć él bele l'ann passè gnü apliché criters nüs por le contribut dles spëises de iade. Indöt él gnü menè ite ćina ala fin d'agost dl 2014 incër 3.235 domandes, ti agn da denant nen êl mesanamënter 7000. Por chëstes domandes che reverda l'ann 2013 y che vëgn dötaurela elaborades él a desposiziun 2,2 miliuns de euro. „I mesi finanziars a desposiziun ti röia śëgn avisa a chi pendolars y chës pendolares che à n tru lunch y compliché por rové söl laûr o ne po nia adorè i mesi de trasport publich porvia dla trassa o di orars de laûr", à dit l'assessur por la mobilité Florian Mussner, che fej dantadöt referimënt a dependënć y dependëntes che fej turnus y vëgn da raiuns de periferia. Les domandes che reverda i agn dan le 2013, inće chëres por le 2012, é tratan gnüdes autoridades y inće en gran pert paiades fora.
Le dërt da presentè domanda à i dependënć y les dependëntes che se tëgn sö de regola tla provinzia de Balsan y mëss arjunje por almanco 120 dis al ann so post de laûr tla regiun y fà na trassa de plü co 18 km olache al ne passa degun sorvisc publich de linia te n interval de almanco mes'ora. Le contribut de spëises de iade vëgn conzedü te chisc caji:
a) sce le dependënt/la dependënta ne po nia tó n meso de trasport publich porvia de so orar de laûr, deache le pröm meso de trasport publich röia sön le post de laûr pormò do che le turnus à metü man y/o l'ultimo meso de trasport publich pëia ia bele denant che le turnus se röies;
b) sce le dependënt/la dependënta che s'anüza di mesi de trasport publics plü adatà, cun laprò inće le tru da jì a pé eventual, aspeta indöt almanco 60 menüć al dé;
c) sce le dependënt/la dependënta che s'anüza di mesi de trasport publics aspeta indöt manco co 60 menüć, mo la staziun d'architada plü daimprò cun poscibilité da lascè jö l'auto é a na lontananza de plü co 10 chilometri dal post d'abitaziun; te chësc caje ti speta le contribut ma por la destanza danter post d'abitaziun y staziun d'architada.
Al ne vëgn nia conzedü n contribut sce le davagn brutto al ann (düć i davagns zënza detraziun dles spëises che po gnì trates jö) fej fora plü co 50.000 euro o sce al vëgn adorè n auto de sorvisc debann. Imporć sot 200 euro ne vëgn nia paià fora. Por la calcolaziun dl contribut vel l'import unitar de 5 cent al chilometer por le iade da jì y da gnì moltipliché por i dis de laûr. Pro vigni domanda vëgnel trat jö l'import por le bol de 16 euro.
Les domandes po ma gnì presentades online. „La forma metüda sö l'ann passè da dè jö les domandes online à dè de bugn resultać, les domades po insciö gnì elaborades cotan plü aslöm" à alzè fora l'assessur Mussner. Le plü debota va chësc cun la cherta di sorvisc ativada, chël ô dì cun n account eGov zertifiché. Che che n'à nia ćiamò ativé la cherta di sorvisc po damanè n account eGov nia zertifiché, mo mëss spo sotescrì personalmënter la domanda.
Dötes les informaziuns y i links por ći che reverda i contribuć de spëises de iade sciöche inće les domandes online é da ciafè tla rëi zivica sot a www.provinz.bz.it sot la rubrica "Sorvisc adorà le plü gonot"; informaziuns telefoniches tl Ofize Trasport de porsones, tel. 0471 415492; e-mail: PendlerBeitraege@provinz.bz.it
Informaziuns y aiüt él inće da ciafè pro i sindacać, i patronać y les comunitês raionales. Informaziuns sön la cherta di sorvisc, süa ativaziun y adoranza é da ciafé sot al numer vërt 800 816 836 y tl internet sot www.provinz.bz.it/buergerkarte.
rc
