Atualità
Bol dl auto: calcolaziun automatica y paiamënt inće ti ofizi dla posta
Le bol dl auto po śëgn inće gnì paié te na forma digitala te düć i ofizi dla posta dla provinzia. An n'à gnanca plü bria da savëi avisa tan che al é da paié. Chësc pon ciafè fora ilò sön le post sc'an conësc i dać dl veicul. Chësc é gnü a s'al dè por mirit de na convenziun danter la Provinzia y la Posta.
La sozieté inćiariada dala Provinzia da trà ite la cuta dl auto à ativé cun la Posta n sorvisc nü de paiamënt online ti ofizi dla posta. Le bol dl auto che toma ai 2 de forà po insciö gnì paié te na manira asvelta y scëmpla cun scioldi en contanć o inće tres bancomat, cherta de credit (Visa o Mastercard) o postepay ti 132 ofizi dla posta dla provinzia. Chësc é poscibl por mirit dl coliamënt cun l'archif provinzial dla cuta dl auto che à implü ćiamò n ater vantaje: por paié la cuta ne mësson nia plü savëi avisa tan che al é da paié. Al basta jì ti ofizi dla posta, scrì fora le formular aposta por talian o todësch che é da ciafè ilò y dè dant le numer de targa dl auto. Insciö controlëia l'ofize dla posta tres la plataforma telematica sce i dać dà dant stimenëia y comunichëia spo avisa tan che al é da paié de cuta dl auto.
USP
