Atualità
Dala Junta: Na strotöra nöia por la fondaziun Dolomites UNESCO
La strotöra aministrativa dla Fondaziun Dolomites UNESCO gnarà plü sotida cun prozedöres plü efiziëntes: chësc à stabilì incö (20 de jenà) la Junta provinziala cun la ratificaziun dles mudaziuns al Statut dla Fondaziun y che reverda l’unificaziun di consëis de direziun y aministraziun te ma plü un n consëi d’aministraziun.
La fondaziun „Dolomiti-Dolomiten-Dolomites-Dolomitis UNESCO“ é gnüda fondada tl 2010, sciöche conseguënza dla detlaraziun dles Dolomites a patrimone natural dl’umanité UNESCO y che tol ite raiuns che fej pert de cinch provinzies y trëi regiuns. Por podëi aministré damì le patrimone dl'umanité dles Dolomites él gnü istituì na fondaziun aposta preodüda dal UNESCO, cun i compić da unifiché les politiches de sconanza, da tignì i contać cun le Ministêr dl Ambiënt y sciöche organn de referimënt por le comitê UNESCO. Öna dles funziuns prinzipales dla Fondaziun é chëra de coordinè les esigënzes y intenziuns dles cinch provinzies (Südtirol, Trënt, Belun, Udin y Pordenone).
„Pro l’istituziun dla fondaziun êl preodü dui organns de direziun: le consëi d’aministraziun, cun rapresentanć dles cinch provinzies interessades, y le consëi de direziun, cun rapresentanć dles cinch provinzies y dles döes regiuns dl Venet y dl Friul-Aunejia-Iulia“, à splighé incö, mertesc ai 20 de jenà, le presidënt dla Provinzia Arno Kompatscher. Cun chësta divijiun essel messü gnì tut en conscidraziun les competënzes desvalies partides sö danter les provinzies y regiuns. „Le problem prinzipal ê chël che les competënzes di dui consëis ê scialdi les medemes, na divijiun tlera dles competënzes ne ê nia stada poscibla da fà“, insciö Kompatscher.
L’esperiënza di pröms trëi agn de ativité dla Fondaziun à condüt insciö a na mudaziun dla strotöra d’organisaziun dla Fondaziun. “I ùn porchël tut la dezijiun da abolì le consëi de direziun y da ti dè inant sües competënzes al consëi d’aministraziun”, insciö le presidënt Kompatscher. Por podëi impò garantì la presënza dles döes regiuns dl Venet y dl Friul-Aunejia-Iulia saràl dui rapresentanć de chëstes regiuns che fajarà pert dl consëi d’aministraziun nü. “Deache al é tl'aria l’aboliziun dles provinzies a statut ordinar él gnü inserì tla verjiun nöia dl Statut dla Fondaziun la poscibilité, che düć i raiuns interessà podará gnì rapresentà inće tl dagnì tla Fondaziun”, à stlüt jö Kompatscher.
rc
