Atualità
Dala Junta: Adatamënt di assëgns de cura y dles indenitês de invalidité
L’assëgn de cura de pröm livel por porsones che à debojëgn de guern y les prestaziuns economiches a bëgn dles porsones cun n'invalidité zivila, di verc y di surć é gnüdes aumentades y adatades incö (20 de jenà) dala Junta provinziala al aumënt dl cost dla vita. 11.500 porsones podarà s’anuzé di aumënć, por la man publica él preodü na spëisa plü alta de 440 mile euro.
“Vigni ann vëgnel adatè les prestaziuns economiches tl setur sozial: la Junta provinziala à insciö tut la dezijiun incö da aumentè l’assëgn de cura de pröm livel por porsones che à debojëgn de guern sciöche inće les prestaziuns economiches a bëgn de porsones cun n'invalidité zivilia, di verc y di surć”, à splighé incö, mertesc ai 20 de jenà, le presidënt dla Provinzia Arno Kompatscher. L’assëgn de cura de pröm livel vëgn aumentè de cater euro al mëis y vëgn adatè al import dl’indenité d’acompagnamënt. Les somes di assëgns por i atrì livì de cura resta anfat. “Inće sce l’inflaziun é basa por le momënt y l’adatamënt ne é nia alt, mëssel impò gnì tut en conscidraziun che l’aumënt reverda 5449 porsones che fej pert dl pröm livel”, insciö le presidënt Kompatscher. L’adatamënt dl’assëgn de cura de pröm livel ala cresciüda dl’inflaziun porta para na spëisa de 261mile euro por la Provinzia.
La Junta provinziala à implü aprovè incö l’adatamënt dles prestaziuns economiches d’assistënza che reverda les ponsiuns d’invalidité zivila, l’indenité de acompagnamënt ai invalids y verc, l’indenité de comunicaziun ai surć, indenitês speziales y assëgns d’integraziun ai verc. Tl 2014 él gnü paié fora zirca 7.455 prestaziuns por zirca 6.000 invalids zivils tl Südtirol. “Le numer dles porsones che s’anüza dles prestaziuns te chësc setur é romagnü tl’ann passè apresciapüch le medemo co ti agn denant, porchël ùnse preodü che inće chësc ann gnaràl paié fora zirca 7.500 prestaziuns cun n aumënt di cosć de 180 mile euro”, insciö le presidënt Kompatscher che à sotligné che l’obietif de chëstes mosöres dess ester chël de smendrì les situaziuns de svantaje por porsones cun n handicap.
Tl confrunt cun le rest dla Taia é l’import dla ponsiun d’invalidité tl Südtirol 55 porcënt plü alt, por ći che reverda les indenitês de acompagnamënt, de comunicaziun y chëres speziales, vëgn chëstes paiades fora 13 iadi al’ann tl Südtirol en confrunt di 12 iadi tl rest dla Talia. Implü é i assëgns d’integraziun por verć ma preodüs tl Südtirol.rc
