Atualità
L’assessuria Stocker sön le barometer AFI: 1508 é i posć de laûr nüs
L’Istitut por la promoziun di lauranć (AFI) à presentè incö (22/01) adöm al’assessuria por le laûr Martha Stocker i resultać dl barometer AFI che mosorëia vigni trëi mëisc la situaziun di lauranć dependënć tl Südtirol. L’analisa dij che la situaziun di lauranć dependënć é presciapüch la medema co chëra dl ann passè, cun n mioramënt indere dles prospetives sön le marćé dl laûr.
Vigni trëi mëisc vëgnel publiché i dać dl „barometer-AFI“, n stromënt de mosoraziun dla situaziun di lauranć dependënć söl marćé dl laûr tl Südtirol. „I resultać dl’inrescida rapresentativa danter 500 di 200.000 lauranć dependënć tl Südtiol nes mostra che la situaziun é presciapüch la medema co dan da 12 mëisc y che i lauranć dependënć se möi cun na gran prudënza“, à splighé incö (22 de jenà) le presidënt dl Istitut por la promoziun di lauranć (AFI) Toni Serafini. „La mioraziun dles condiziuns por les aziëndes lascia sperè che i investimënć y i posć de laûr aumentëies tl dagnì“, à sotrissé le diretur dl AFI Stefan Perini tratan la presentaziun di dać a Balsan. Inće sce al é gnü registré valgönes dificoltês resta na chersciüda dl’economia südtiroleja de un n porcënt poscibla, insciö Perini.
L’assessuria por le laûr Martha Stocker à recordè i dać positifs che reverda i posć de laûr, olache al é gnü registré n aumënt dl 0,8 porcënt. „En confrunt cun l’ann passè él implü gnü registré n aumënt de 1508 posć de laûr. Les mosöres dla Junta provinziala, danter chëstes la diminuziun dl IRAP, à porté a na maiù stabilisaziun di posć de laûr“, à sotligné Stocker. Implü presentarà la Junta provinziala proscimamënter na proposta de lege por renforzè le marćé dl laûr, insciö l’assessuria Stocker che à sotligné l’importanza da investì te ponsiuns integratives dantadöt te na perioda de crisa economica.
Le diretur Perini à inultima alzè fora n valur positif che reverda l’aumënt dles assegnaziuns di credić ales aziëndes tl ann passè. Dal’atra pert él diminuì indere i fić sön i sparagns. „I sparagnadus ćiara dantadöt sön la stabilité dl valur dl capital metü da pert“, à dit Irene Conte dl AFI che à sotligné che la gaujia prinziapala dles porsones por mët da pert scioldi é le dagnì dles mitans y di mituns.
rc
