Atualità
Assistënza da d’isté y dl domisdé: L’assessuria Deeg incunta i Comuns
6,5 miliuns de euro de investimënć, sura 300 proieć y 50.000 partezipanć – chëstes é ma valgönes dles zifres che reverda l’assistënza da d'isté y dl domisdé por mitans y mituns tl Südtirol. L’assessuria Waltraud Deeg à incuntè incö (23/01) plü rapresentanć dles comunitês comprensoriales, di organisadus y anuzadus di sorvisc por tratè l’oferta, la cualité y la colaboraziun por le dagnì.
„La domanda do l’assistënza dl’isté y dl domsidé por mituns y mitans é aumentata tresfora ti ultimi agn“, à splighé incö, vëndres ai 23 de jenà l’assessuria por les families Waltraud Deeg tratan n’incuntada cun rapresentanć dles comunitês comprensoriales, di organisadus y anuzadus di sorvisc. Tl ann passé él insciö gnü aumentè i mesi finaziars da 4,5 miliuns a indöt 6,3 miliuns de euro. Por l’ann 2015 él gnü metü ite tl bilanz provinzial diretamënter 6,5 miliuns de euro.
Cun l’aumënt dles domandes do assistënza él inće gnü amplié l’oferta: tles citês él la maiù pert di proieć che à na dimenjiun plü grana, tles valades cun pici comuns él gnü metü da jì ativitês d’assistënza che fej dantadöt da punt tles periodes de feries scolastiches. „Nosta intenziun é chëra da sostignì proieć che s’orientëia dantadöt a standarg de cualité y ai bojëgns dles families“, à sotligné l’assessuria Deeg dan da söporjö 50 rapresentanć tla sënta dl’Agenzia Familia tl Palaz provinzial 12 a Balsan, „y porchël é les minunghes y les esperiënzes di comuns y di organisadus te chësc contest de gran valüta.“
Do la presentaziun da pert dl’assessuria à le colaboradù dl’Agenzia Familia Gerhard Mair presentè la lege sön la familia nöia, jon ite dantadöt sön i aspeć che reverda l’assistënza tratan les feries y l’assistënza dl domisdé. Insciö él gnü metü da jì tl ann passé indöt 243 proieć d’assistënza estiva (sura 200 en gestiun privata), 36 proieć é gnüs organisà dai Comuns. Cun na partezipaziun de 50.000 mituns y mitans é l’oferta gnüda tuta sö bun. Implü él stè tl isté passè 29 scolines che à pité programs d’assistënza cun 1.300 partezipanć. „Les ofertes d’assistënza da d’isté é dër desvalies, ares döra mesamënter döes edemes, mo i ùn inće programs cun na dorada de 12 edemes“, à sotligné Gerhard Mair.
Tratan l’incuntada él inće stè na pert di comuns che à presentè tl detai sü programs, sciöche por ejëmpl le Comun de Eppan y le Comun de Porsenù. Les comunitês comprensoriales, che coordinëia i proieć suracomunai danter i comuns, i sorvisc soziai y i rapresentanć di geniturs à inće presentè sües ativitês.
rc
Galaria dales fotografies
