Atualità
Pröma incuntada dla Consulta por les families nöia
La Consulta provinziala nöia por les families é formada da indöt 19 mëmbri y s’à incuntè incö (23 de jenà) a Balsan por süa pröma sentada. Öna dles competënzes primares dla Consulta é chëra de aconsié la Junta provinziala pro chestiuns y mosöres che reverda les families. „Cun l’aumënt di mëmbri ùnse orü ti dè n maiù pëis ala Consulta“, à sotligné l’assessuria por les families Waltraud Deeg.
La Consulta por les families é gnü istituida por le pröm iade cun la lege provinziala sön la promoziun y le sostëgn dles families tl ann 2013. Tl test de lege aprové êl preodü n organn consultif de 11 mëmbri. Cun la lege omnibus nöia che reverda le setur sozial é le numer di mëmbri gnü aumenté a 19. „Chësta dezijiun é gnüda tuta por ti dè n pëis ćiamò maiù a chi che se crüzia dé por dé dles chestiuns che alda pro le monn dles families“, à splighé l’assessuria por les families Waltraud Deeg incö tratan la sentada tl Agenzia por les families a Balsan. Cun l’ampliamënt numerich él inće gnü laprò, tres la lege omnibus nöia tl ćiamp sozial, competënzes nöies por la consulta. „Insciö sarà le compit prinzipal di mëmbri da ester le pröm punt de lian danter les istituziuns y les families“, à sotligné l’assessuria, che é inće la suranstanta dla Consulta.
La pröma sentada é inće gnüda anuzada por concordè düć adöm les prozedöres de colaboraziun y por stabilì n percurs d’elaboraziun de n program trienal. Implü él gnü baié dl’anuzamënt dl „fonds regional por le sostëgn dles families y dles ocupaziuns“, de chël che al gnarà debatü inant te na tlausöra tl mëis de forà. La Consulta à nominé Irmgard Pörnbacher sciöche rapresentanta tl grup Audit "Familia&Laûr".
L’ann passè s’à la Consulta por les families incuntè cinch iadi y à laurè para danter l’ater sön le dessëgn de lege sön la cuta comunala sön i imobiliars (CCI;GIS) y à dè jö arać sön cater dessëgns de lege omnibus. I temesc prinziapai che la Consulta à tratè tl ann passè é stà l’assistënza ai pici mituns, mosöres de prevenziun por les families y le pachet familia dla Regiun.
rc
