Atualità
„Cin valedes – cin sënsc“: Festa ladina ai 31 de jené tla Teßmann
La biblioteca provinziela "Dr. Friedrich Teßmann" a Bulsan urganisea n sada, ai 31 de jené na festa aldò dl moto “Cin valedes – cin sënsc” per la fin dla lingia de scumenciadives “Per ejëmpl la Ladinia”, cun chëles che l ie unit presentà de plu tematiches dl mond ladin. L program de festa mët man dala 10:30 y durerà nchin dala 20 da sëira cun mujiga, film, bal, letures y delicatësses culinaries.
Na festa cun mujiga, film, bal, letures y delicatësses culinaries: nsci festejea la Biblioteca provinziela n sada, ai 31 de jené la cuntlujion dla lingia de manifestazions „Per ejëmpl la Ladinia.” Artisć/Artistes y autores da ncueicundì che ie ncantëur te dut l mond y mpò nravisei te si ncësa pieta tla Biblioteca ejëmpli dla richëza culturela tla valedes ladines.
La scomeciadiva mët man dala 10.30 cun la proiezion y l dialogh sun l film „Die Ladiner – Das Urvolk der Dolomiten“, n film de Claudia Gerstl y Tamara Diepold. L film ie unit crià pra la Università Alpen-Adria de Klagenfurt tl cheder dl curs universiter “Medienwerkstatt” sun la tematica arpejon culturela.
Dadedò jirala inant dala 11.15 cun n Bal de Anastasia Kostner, performadëura, balarina, dozënta, che porta a esprescion te si performance coche la viv si “vester ladina”. Tl muvimënt vëijela ëila la puscibltà de purté a esprescion cosses che ne ie nia plu esprimibles cun la rujeneda. L’ert ie per ëila una na maniera de comuniché danter la cultures.
Dala 12 saràl Jean Daniel Granruaz y Karin Nakagawa (Koto, zitra iapaneja) che piterà n valgun mumënc de ntratenimënt cun cianties de mujiga pop mescededa cun mujiga etnica. Jean Daniel Granruaz ie n ciantautor dla Val Badia che sona la chitara, Karin Nakagawa vën da Koto tl Iapann y sona la zitra iapaneja. La s’à fat n inuem coche cuntadëura de stories cun acumpaniamënt dl Koto, plu tert àla scumencià a cianté cun l acumpaniamënt dl Koto.
Dala 14 saràl Simon Perathoner y Vigile Iori che presenterà la tematica dla leteratura cun tesć sperimentei de prosa y lirica. La moderazion sarà de Rut Bernardi, romanista, publizista, scritëura, tradutëura tl ladin.
Max Castlunger (percuscion) y Emanuel Valentin (hang, musizist y etnologh) sunerà dala 15.00 mujiga dal vif cun uni sort de strumënc a percuscion, l hang (strumënt nventà tla Svizra ntëur l’ëuta dl milené) y flauc de dut l mond che l culeziunea y mët n mostra.
Dala 16.00 sarà l jurnalist, scritëur y ciantautor Iaco Rigo y la maestra, paura, scritëura Teresa Palfrader che se dajerà ju cun la tematica dla leratura ladina. La moderazion sarà de Rut Bernardi.
Dala 17.00 ti uniràl inò dat lerch ala mujiga dal vif cun Georg Malfertheiner (vibrafonn) y Ivan Miglioranza (chitara): i doi musizisć s’à abinà si stil persunel y i lascia vibré deberieda l vibrafonn y la chitara, da tlo si inuem “Vibrarre Jazzduo”.
Mateo Taibon, studiëus dl teater y dla scienzes dla mujiga y jurnalist menerà i presënc dala 18.00 inant tl mond dla mujiga y leteratura ladina. La scumenciadiva culturela y leterera se stlujerà ju dala 19.00 cun na jam session de mujiga y cun delicatëzes culinaries njiniedes ca dala paures de Longiarü che piterà tutres fates n cësa y d’autra spezialiteies dla gastronomia ladina.
La sënta dla biblioteca “Friedrich Teßmann” ie tla streda Armando-Diaz 8 a Bulsan, tel. 0471 471814, adres internet: http://www.tessmann.it/la/home.html.
USP
