Atualità
Dala Junta: Plü ressures finanziares y posć por le sorvisc zivil volontar
La Junta provinziala à alzè incö (27 de jenà) dl 28 porcënt i mesi finanziars por le sorvisc zivil volontar che porta para n aumënt de 120 posć (a 330 posć indöt) che la Provinzia metarà a desposiziun por le 2015. Por realisé chësc fin à la Junta provinziala aprovè indöt n investimënt de 1,4 miliuns de euro.
Tl 2014 él stè indöt 210 porsones che à fat na perioda de sorvisc zivil tl Südtirol y che é gnüdes partides sö ti programs "istituzionalisà" dl sorvisc zivil volontar: indöt 82 jogn danter i 18 ćina ai 28 agn y 47 porsones adultes sura i 29 agn à fat tl 2014 n sorvisc zivil provinzial volontar. Implü él stè 78 scolars y scolares danter i 15 y i 19 agn che à tut pert a formes de sorvisc volontar tratan l’isté. Düć i partezipanć laôra tratan la perioda de sorvisc zivil volontar pro n'organisaziun no profit y ciafa n paiamënt al mëis danter 300 ćina 450 euro.
„Deache le numer dles domandes é aumentè cotan – sides da pert dles organisaziuns co inće dales porsones che ô se scrì ite – à la Junta provinziala tut la dezijiun da aprovè dl 28 porcënt les ressurses finanziares a desposiziun cun na soma d’investimënt totala de 1,44 miliuns de euro“, à splighé incö (27/01) le presidënt dla Provinzia Arno Kompatscher do la sentada dla Junta provinziala. Cun chësta soma saràl meso da finanzié tl 2015 indöt 330 volontars, 120 implü co tl ann passè. „L’aumënt plü gran reverdarà le sorvisc sozial provinzial volontar, olache al gnarà metü a desposiziun indöt 135 posć y olache l’ann passè 50 domandes ne é nia gnüdes azetades. Por ći che reverda le sorvisc volontar da d’isté passarà i posć da 78 a 95“, insciö Kompatscher.
Le program anual elaborè dal Ofize Afars de cabinet é gnü aprovè incö dala Junta provinziala y le presidënt dla Junta à sotligné che „le volontariat é öna dles gran ressures de nosta sozieté y che al é dërt da la valorisé le plü poscibl.“ Le presidënt dla Provinzia Kompatscher à injunté che cun les trëi variantes de sorvisc zivil volontar ti vëgnel pité l’ocajiun ai jogn, ales porsones adultes y ai seniors da mët en pratica laûr de solidarieté y de aiüt por la popolaziun.
rc
