Atualità
Aodles de insulina por mituns da śëgn tl register dles medejines retüdes
La Junta provinziala à aprovè incö (27 de jenà) l’inserimënt dles aodles speziales por les inieziuns d’insulina ai mituns. Chëstes adoles dër sotides à le vantaje che ares smendrësc le mé di mituns tratan l’inieziun. Les aodles gnarà metüdes ite tl register dles medejines dal 1. de aurì dl 2015 inant.
Ćina śëgn ne ê les aodles speziales por l’inieziun ai mituns che sofrësc de diabetes nia tl register dles medejines che vëgn retüdes. La Junta provinziala à tut incö, mertesc ai 27 de jenà la dezijiun da aprovè la domanda che ti é gnüda fata dal’Assoziaziun Diabetics dl Südtirol da to sö les aodles tl register dles medejines retüdes dal 1. de aurì dl 2015 inant.Les aodles da insulina podarà ma gnì prescrites por zirca 200 mituns y mitans sot ai 18 agn che sofrësc de diabetes, la Repartiziun Sanité dla Provinzia é stada bona da stabilì na soma de retüda dër a bun prisc y che é de 0,42 euro por aodla.
rc
