Atualità
Implanć RAS: La Junta à aprovè na convenziun por mioré l’anuzamënt
Anuzè les staziuns dla RAS te na manira otimala, menè fora informaziuns dla proteziun zivila te na manira capilara y alisiré le finanziamënt dles emitënzes locales: chisc é i obietifs dla convenziun nöia aprovada incö (27/01) dala Junta provinziala por ći che reverda l’anuzamënt di implanć de trascmisciun dla RAS.
Un di obietifs dla Junta provinziala é da öna na pert chël da ne messëi nia aumentè le numer de staziuns de trascmisciun dla RAS tl Südtirol, mo dal’atra él important da garantì n sorvisc de curida dl teritore otimal cun la plü gran cuantité de programs radiotelevisifs, sorvisc radio y trascmisciuns de dać por terzi. Por arjunje trami dui i obietifs à la Junta provinziala aprovè incö (27 de jenà) na convenziun che reverda l’otimisaziun dl’adoranza coletiva dles strotöres esistëntes por i sorvisc dles emitënzes de radiotelevijiun publiches, dles emitënzes de trascmisciun provinziales, dles emitënzes privates y di gesturs por la telefonia mobila.
La Radiotelevijiun Aziënda por le Südtirol (RAS) dla Provinzia mët insciö a desposiziun sü implanć y sües staziuns por emitënzes publiches, privates y por gesturs dla telefonia mobila. Les emitënzes mëss paié na tarifa anuala por l’anuzamënt di implanć. Al é preodü na reduziun dl prisc sce les emitënzes garantësc la defujiun de informaziuns dla proteziun zivila dla Provinzia.
Cun la convenziun nöia à la Junta provinziala aprovè na reduziun dl 80 porcënt dla tarifa de conzesciun ti caji de n’adoranza coletiva dles staziuns dla RAS. N’emitënza che ćina śëgn paiâ na tarifa anuala de 2.800 euro, paiarà tl dagnì 560 euro. „Chësta reduziun dla tarifa de paiamënt é n contribut por amplié le pluralism di media tl Südtirol – à ajuntè le presidënt dla Provinzia Arno Kompatscher – y reverda n pachet ampl de mosöres cun chël che la Junta provinziala ajornëia le sostëgn ales emitënzes locales.“ Chësta dezijiun porta para vantaji por les emitënzes de radiotelevijiun che à n contrat cun la Proteziun zivila dl Südtirol por la defujiun de informaziuns ala popolaziun ti caji de nezescité. Implü ti va chësta convenziun adincuntra ai emitënć de televijiun y radio che mët a desposiziun dla RAS trascimiscuns por la defujiun de informaziuns che reverda ativaziuns nöies, mudaziuns de frecuënza y problems de rezeziun.
L’adoranza coletiva di implanć dla RAS porta para inće na maiù proteziun por la popolaziun y na diminuziun dl’incuinamënt. La RAS à en gestiun por le momënt 120 staziuns de trasmisciun cun chëres che ara cür le 99,6 porcënt dl teritore südtirolej.
rc
